英國靚聲天后Adele上周三在加拿大溫哥華開騷，例牌請粉絲上台互動，點知帶來全場驚喜。當晚一位來自非洲尼日利亞的男歌迷被選中上台，拿着電話不停跟偶像近距離影合照，還一齊合唱。唱完後，Adele上前攬攬諗住錫對方面珠，但他突然擰轉面，變成二人當眾咀嘴！Adele嚇到用手掩嘴尖叫，男粉絲就開心到舉手勁跳，全場立即歡呼喪嗌。Adele好快冷靜下來，同大家講笑話：「感謝主！他（老公）冇嚟睇騷。」