徐肇平登堂入室張曦雯香閨煮飯仔

26歲的張曦雯（Kelly）由美國回港發展，入行短短數年雖然緋聞不多，但曾與胡杏兒老公Philip Lee（李乘德）傳出戀情，有指二人拍拖數月已極速分手，及後Kelly即戀上合作主持明珠台節目《港生活．港享受》，同是外國長大、由加拿大回港的黃淑儀兒子徐肇平，二人相戀至今感情穩定，更不時雙雙出席友人間的聚會。

據悉Kelly及徐肇平拍拖以來愛得甜蜜，已達見家長地步，戀得難捨難離的兩人，日前雙雙應邀出席於中環舉行的活動後，前後腳返回女方位於北角的寓所二人世界。當晚大約九時許，Kelly於活動後步往附近的路邊等車，期間見她頻頻講電話，似是與男友電話傳情，上車後她直返北角寓所，梳洗過後又匆匆離家，並往會合男友，已換上一身簡約打扮，穿上牛仔褲及背心大晒麒麟臂的徐肇平，及後與女友往附近購買大袋外賣，急趕返回香閨撐枱腳，步入大廈時表現鬼祟，徐肇平四處張望一輪，才跟隨以長髮遮面的Kelly入內，至深宵仍未見他離開。

張曦雯與徐肇平孖公仔搵銀，寓工作於談情。	日對夜又對，張曦雯（箭嘴）與徐肇平（左）出席活動後返回女方香閨。	張曦雯活動後披上外套即趕住返屋企等男友。

人肉速遞

向來深閨的Kelly對男友亦照顧有加，事隔數天她於下午五時許離家，並前往附近的超市掃貨，戴上口罩的她甚為避忌，急急購下不少生果及餸菜後，即返家等男友回來齊齊煮飯仔。另一天有工作在身的Kelly，乘的士前往中環拍攝，見她工作後又極速急趕回家慰男友。

戴罩買餸 張曦雯到超市入貨玩煮飯仔。	趕會愛郎 打扮靚靚的張曦雯工作後急搭車見男友。	張曦雯對自己身材甚有自信，曾在網上大晒優質股。

對於被踢爆夜訪女友香閨，徐肇平接受訪問時極為驚青，死撐不敢認愛：「我冇上過佢屋企呀！我幾個星期冇見過佢喇，呢排忙到所有朋友都見唔到。（忙咩？）之前喺美國拍完微電影返嚟，依家又要錄VO，又要補Shot。」否認與女方拍拖的他又指自己仍是單身：「佢（指Kelly）唔識做朋友啦，咁都唔介紹啲女仔畀我。」

承認夜訪

反觀Kelly與男友卻前後矛盾，她承認當晚活動後徐肇平有上香閨作客，但卻連番解釋說：「佢有上嚟呀，蔡思貝都有，蔡思貝仲有我屋企鎖匙添，所以嗰晚係蔡思貝上咗我屋企先，之後到我返屋企，肇平再上嚟。然後其他人都開始上嚟，都差唔多有成十個人。（佢着成咁係打算過夜？）冇呀，佢不嬲都係咁Hea，成日着背心。」提及與對方拍拖一事時，Kelly突然表現避忌，笑指：「我另有對象，我話我冇Dating，啲人都覺得怪啦！（唔認徐肇平？）佢一定冇份！（你咁講佢會傷心！）佢唔會啦，佢大把女性朋友。」

張曦雯（Kelly）Profile

身高：1米75

年齡：26歲

學歷：伊利諾大學芝加哥分校企業管理系

入行：2010年以模特兒身份來港發展，2011年參加「芝加哥華商會華裔​小姐」，於2012年參選「國際中華小姐」奪冠。其後簽無綫經理人合約，因英語和口才了得獲安排擔任主持工作。

徐肇平（Shaopin）Profile

身高：1米88

年齡：28歲

學歷：Vancouver Film School

入行：母親為無綫演員黃淑儀，出生於加拿大，畢業後在當地演出多做閒角，後來港發展，2014年簽約無綫。

文、攝：追蹤組