歌手吳業坤將於8月10日在紅館舉行處男演唱會，早前坤坤談票房時曾戲言：「一日就賣晒啦！」昨日他到電台宣傳新歌《被單身的人》時自責說：「有啲嘢係唔可以亂講，呢啲係禍從口出，後悔一世！」他坦言會自我警惕：「依家講嘢會慢啲，唔想講錯嘢。（係咪被人鬧？）自己都覺得有問題，人哋點會唔覺有問題。（如果真係一日賣晒飛呢？）係鬆口氣。」其演唱會八成座位不作公開發售，據坤坤分析，應是供贊助商、協辦商及內部訂票：「好多歌迷內部訂飛，亦多謝好多藝人朋友問有冇飛買。」
