默里爆MJ想娶11歲愛瑪
被指有孌童癖的已故天王米高積遜（Michael Jackson、MJ）不只對男童有興趣！其私人醫生默里（Conrad Murray）出爆料書，指MJ在契女12歲時已想娶她為妻，若不成功就娶當時年僅11歲的《哈利波特》女星愛瑪沃森（Emma Watson）！
曾被判過失殺死MJ入獄的默里，最近推出爆料書《This Is It》搵銀，聲稱一向被指喜愛男童的MJ其實也愛女童。默里指MJ曾向他承認，愛上前童星好友麥里斯德（Mark Lester）的5歲女兒Harriet，當她12歲時更打算娶她為妻！
首選娶12歲契女
默里寫道：「MJ喺倫敦準備《This Is It》演唱會時，想我陪佢去搵Harriet老竇，傾迎娶佢嘅計劃。我有憂慮，因為Harriet喺世上大部分地方都法律上未夠秤去結婚，我問米高佢幾歲，米高話佢都唔清楚，認為佢差唔多12歲。」默里提議MJ考慮古巴特立尼達與千里達印度教的包辦婚姻，但認為Harriet年紀太小，不會被容許，MJ表示會找人研究迎娶Harriet在法律上是否可行，又對默里說：「你要發誓唔可以同其他人講呢樣嘢，只有你會知道幾時先係適當時機。」
家藏人形紙牌
默里又指MJ同樣迷戀在《哈利波特》（Harry Potter）中飾演「妙麗」的愛瑪，其洛杉磯寓所更有她的紙牌公仔，默里寫道：「米高話我聽佢差唔多一樣咁鍾意愛瑪沃森，佢喺2001年睇到愛瑪演出第一集《哈利波特》就愛上佢，當時愛瑪只有11歲。如果MJ娶唔成Harriet，就打算用愛瑪做替代品。」默里又指MJ向他承認從未與前妻黛比（Debbie Rowe）行房。
愛瑪今年已經26歲，日前更被拍得與男友William 'Mack' Knight在倫敦高調拍拖。二人於今年2月公開戀情，但早於去年10月已被目擊在紐約拍拖。
文：外娛組