鄭希怡咀何嘉莉自爆sheshe情
前藝人何嘉莉（Lillian）與歌手鄭希怡（Yumiko）向來老友，但去年Lillian結婚時，卻未有邀請Yumiko出席婚宴因而傳出不和。昨日兩人出席活動時，不肯就事件作解釋，但就當眾連咀兩次證恩愛，大玩SheShe情，Yumiko更笑言早在英皇年代已暗戀對方。
四位星級潮媽兼好姊妹鄭希怡、何嘉莉、黃伊汶（Emme）及谷祖琳（小谷），昨日齊齊出席護膚品牌ALBION健康美肌新體驗發布會。四女悉心打扮，名副其實是城中索媽。
冇請去飲傳不和
提到去年11月Lillian再婚下嫁機師男友時，卻未有邀請好友Yumiko去飲，因而傳不和，兩位當事人聞言面帶愕然，不懂反應。Yumiko更即場扮黑面說：「我頭先已經扮咗nice好耐。」問到Lillian有何解釋？Lillian表示：「唔使解釋，我有打電話畀佢傾過，好難（同你哋）講。」Yumiko見狀打圓場謂：「你帶個仔同我個女相睇啦！（有冇唔開心過？）假o架，講吓，真係冇嘢。」當記者要求二人攬攬泯恩仇時，Lillian強調：「我哋冇恩仇，何來泯。」兩人雖拒絕攬攬，但卻主動咀嘴兩次大晒「恩愛」。被取笑SheShe情時，Yumiko更開玩笑說：「咁即係我哋兩個結婚同生仔係假，所以我唔去佢嘅婚禮，你明點解啦，我喺英皇嗰時已經暗戀佢。」非常搞笑。
小谷囡囡黐到實
此外，活動期間，小谷的四歲女兒現身並要黐實媽咪合照。小谷坦言工作時也會盡量帶女兒在身邊，更笑言：「頭先真係失禮晒。（囡囡鍾意影相？）佢好鍾意大家嚟睇佢，我同老公都唔係咁嘅性格，可能佢將我抑壓咗嘅一面爆發出嚟，哈哈！」
至於Emme的兒子常被稱讚靚仔，Emme不禁開心地說：「佢真係好靚仔，不過我媽咪話唔可以喺小朋友面前讚佢靚仔，要話佢醜。囝囝平時冇乜表情，但對住相機會有眼神。佢好搞笑，好chok，我真係好想播林峯首歌《Chok》佢聽。」
文：名人組