梁家輝三戰城城拍埋先「退休」

由梁家輝、周潤發與郭富城主演的《寒戰2》直至昨日上映九日，票房錄得逾4,000萬港元，勢將打破上集所創下4,280萬港元的香港總票房紀錄，內地票房亦已衝破5.5億人民幣，遠遠拋離上集的2.53億人民幣總票房，台前幕後雀躍非常！家輝昨午偕導演之一的陸劍青出席謝票活動，首次在港參與這類活動的他大感新鮮，笑言要「畀Like」入場支持的觀眾，又衝向觀眾席玩自拍。

唔諗提名影帝

由於票房成績出眾及先後刷新多項紀錄，陸劍青直言對籌拍第三集添壓力。問到會否要觀眾多等四年才開拍？家輝說：「發哥（周潤發）話咗唔要等咁耐嘛！半年左右啦！（你預咗檔期？）我哋呢啲退休前休假，梗係等拍呢啲戲啦！所以係會復出影壇嘅。（有望憑此片再次提名影帝？）唔諗呢啲，淨係想帶多部好戲畀大家。（下集加重你同周潤發戲份？）總之我哋就一個都不能少！」

主演的《寒戰2》票房勁收，梁家輝（右）舉V都零舍得戚！	梁家輝準備定拍第三集，笑言與周潤發、郭富城一個都不能少。	梁家輝大打親民牌，親自揸機與觀眾自拍。

踩城城場慶功

戲中的周潤發曾對家輝說一句「我下半生乜都唔做，淨係服侍你！」而成網民潮語，家輝昨日受訪時來一個神回覆：「嘩！神級影帝咁講，我聽日就約佢去行吓山，同食吓盆菜先。」由於郭富城忙於綵排個唱，《寒2》片仍未定慶功日子，家輝忽發奇想：「唔好阻住人做嘢，我哋到時咪成班衝上佢個台一齊慶祝囉！」另外，對於有自稱該片副導演的人捲入性侵案，家輝阻止陸劍青回應並笑說：「我哋唔答呢啲問題，套戲依家咁Hit，相信嚟緊仲會有呢類新聞。」

文﹕影視組