連詩雅誤發「粗口」短訊
藝人連詩雅（Shiga）及葛民輝等昨晨到中環出席AAPE「海賊王.夏日激航狂歡世界」One Piece Run開跑活動，Shiga早前在網上發文，誤將Peace當Piece，她說：「陣間都會出Post，但會自己、助手各Check三次至發送，之前我開埋Facebook Live罰抄，但都有人問係咪搵人幫手？大家放大啲相睇，就會見到係我一個人嘅字迹，我都懷疑自己有溝通同表達能力障礙。（寫嘢畀男友會唔會錯？）平時發短訊畀朋友、同事都會錯，有時仲會因為手機嘅拼字檢查搞到變咗粗口。（你遇到粗口會掉頭走或打冷震？）拍戲有時都需要我講，我會睇吓有冇走棧位。」
葛民輝則提出大堆理由解釋為何不跑，他說：「我只會喺起點鳴槍，我少運動，聽過教練話冇運動開，唔好一嚟就咁劇烈，好易骨膜炎呀！應該先去健身室、會所行吓機先，跑街啲路面好易傷到膝頭。」另外，同場有「新美心妹妹」胡梓盈（Keicy）與母親Fiona，Fiona透露囡囡今年由幼稚園畢業直升原校小一，十分開心，又指有出版商洽談母女在書展期間推出親子書，但因Keicy之前忙於準備升小一而把計劃延遲。
