張兆輝接老友棒收視零壓力

張兆輝、陳松伶、王卓淇與陳瀅等一班無綫劇集《全職沒女》演員，前晚相約在尖沙咀食煞科飯，張兆輝更加特別由橫店趕返港，他說：「今次合作開心又有人情味，之前煞科大家唔捨得走，等埋拍完最後一場至肯一齊收工，監製仲請食糖水慶祝，我好感動！」

最快明年再拍劇

提到歐陽震華《一屋老友記》叫好叫座，珠玉在前，緊接該劇播出的《全》劇主角張兆輝對收視冇壓力：「劇集收唔收得有好多因素，好似《性在有情》放喺收費電視播，好多粉絲睇完都話其實唔係咁三級，收視唔理啦！總之拍得開心、快就得，當然想觀眾有共鳴、收視好。TVB係我娘家，冇TVB我都冇今日。我都未知個劇幾時上，要問監製，後期都要做一、兩個月啦！（幾時再返無綫拍劇？）最快要出年，本來諗住暑假同小朋友去旅行，但係接咗一套內地大型古裝科幻劇，嚟緊仲要拍電影，可能新年先可以同佢哋去旅行。」

張兆輝讚全組手足充滿人情味，合作到唔捨得走。	王卓淇自爆有份夾一圍錢請食飯。	陳瀅以性感打扮上陣，微「峰」送爽！

與夫合作有拗撬

陳松伶則指與張兆輝一人一半請吃飯，笑言開工時兩人似足家長。提到與老公在內地投資開劇，由她負責策劃、老公負責製片工作，問到會否有爭拗？松松笑說：「會呀！希望唔會因為一套劇而離婚，我EQ都要調高，其實佢都會就我嘅，大家講道理。」王卓淇則補充：「我同張振朗、陳瀅、謝東閔負責請一圍，覺得好光榮。」

文：影視組