城城恨拍第3集驚老闆唔投資
郭富城主演新戲票房破紀錄同時宣布「添食」，心情勁靚的他獲電影公司送上印有其名字的香檳作「賀禮」。講明想演第三集的城城笑言擔心老闆唔開拍：「佢唔投資點算？」
城城與楊采妮（Charlie）等前晚出席主演新片《寒戰2》的「群星好友場」，吸引大批圈中好友包括錢嘉樂夫婦、范振鋒夫婦及無綫高層樂易玲等拉隊捧場，加上粉絲圍觀逼爆戲院大堂，認真墟冚。
繼續保護市民
席間城城宣布電影前日正式上映，至晚上9時已錄得448萬港元票房佳績。昨午電影公司再向傳媒公布首天票房實收5,388,370港元，累積票房數字為6,380,425港元，打破今年大年初一周星馳《美人魚》創下的494萬港元的開畫紀錄。同時內地首天票房亦輕鬆破億，榮登本港華語動作片首天票房之冠，台前幕後可謂飲得杯落。
城城與Charlie獲電影公司送贈分別印有其名字的香檳，導演梁樂民更承認會開拍《寒戰3》，難怪城城受訪時表現興奮。問城城會否繼續參演《寒》片？他笑謂：「要問吓老闆先喎，佢唔投資點算？如果係都應該會（再拍），大家好喜歡睇我個角色，點樣保護香港市民嘅生命同財產嘛。」他又謂相信電影公司會安排慶功，不過自己已全程投入個唱綵排，暫未知能否配合時間。
台灣打風 兵分兩路
談到《寒》片台前幕後原本出席台灣首映，再拉隊飛返香港造勢，可惜因台灣打風，電影公司臨時決定兵分兩路，安排城城及梁樂民連夜飛返香港，以免影響香港的「群星好友場」。城城表示未有遇上強勁空中氣流：「係航班delay咗少少啫。我個心同留喺台灣嘅梁家輝，以及另一導演陸劍青一齊，今晚我亦代表埋佢哋。知道我冇出席令台灣粉絲有啲失望，不過相信佢哋會明白同體諒，總有機會見面，或者遲啲飛過去謝票囉。」
另外，電影公司老闆江志強於台上致謝詞表示：「多謝台前幕後共同努力，周潤發今次出席咗好多次宣傳活動，尤其有兩次喺飛機上被困十幾個鐘，真係好辛苦。」
文﹕影視組