羅天宇細佬胡（非玉）改名戰港男
香港先生繼首輪面試出現「真‧細佬」王浩信胞弟王瑋彤後，昨日又出現另一位細佬，就是2008年香港先生羅天宇細佬胡（非玉），雖然同母異父，但二人樣貌相似，胡（非玉）比哥哥更健碩。生腎石的王瑋彤甫出院即趕來複試，而程可為姪仔楊灌澤與另外兩位「過江龍」亦加入戰團，質素比一眾「本地薑」佳。
《2016香港先生選舉》昨日進行複試，61位首輪面試者foul剩17人，之前「騎呢」一族包括卡通精靈球的「小智」Jason、變髮律師Granald等已消失，新加入的有來自加拿大「型男家族」的優勝者楊灌澤（Christian）、鍾君揚（Freeyon）及Karl，質素比「本地薑」較佳。
而今年與藝人有關係的參賽者不少，除了Christian是藝人程可為姪兒、王浩信細佬王瑋彤（Tony）都進入複試外，當中被喻為「翻版羅天宇」的22歲參賽者胡（非玉）（Fei）原來亦是「真‧細佬」，真的是2008年香港先生羅天宇同母異父的細佬，二人相當似樣！當年羅天宇參賽時冧暈一眾女性而奪冠，而Fei條件亦相當不俗，靚仔、大隻、更有少少傻氣，果然是「美男家族」！Fei於2012年曾以「羅駿宇」之名參選亞洲先生，現時改名換姓參選，相信是希望洗底再戰！
獲全家力撐
哥哥羅天宇接受訪問時說：「係呀！你哋咁都認得。（都好似你！）佢大隻啲，佢鍾意做gym，有一排操得好犀利，佢都OK，好乖仔，不過都有啲緊張。」羅天宇今次做細佬的提名人，說到選香港先生要穿泳褲，羅天宇說：「我都OK，佢絕對冇問題！佢最近都接咗個舞台劇，不過依家驚撞期做唔到，佢對呢行不嬲有興趣，之前諗過入無綫訓練班，諗諗吓不如參加香港先生啦！媽咪都好支持。」
程可為姪仔信心爆棚
至於另一「真‧細佬」Tony被哥哥王浩信爆生腎石入院，昨日甫出院便去複試的Tony比其他參賽者遲兩小時到，手背位更貼着抽完血的膠布，問他是否已康復？他說：「好番啲啦！OK啦！（對參賽有影響？）OK啦！（參賽壓力大？）OK啦！（今早出院?）係！喺醫院過嚟！（病會影響參賽體力？）正常！OK啦！」而其兄浩信昨日出席活動時表示Tony不用做手術，問會否睇好細佬？他說：「唔會！（仲未接受佢參選？）男仔要用打擊攻略嘛！我對佢一直比較嚴謹，佢份人又比較斯文怕醜，不過屋企人有乜決定，我都會支持。」
而程可為姪仔Christian坦言很有信心，問可有約姑媽見面？他說：「我哋有約飲茶。（姑媽醒你參賽招數？）冇！唔係姑媽叫返嚟參賽，係自己返嚟選。」而程可為受訪時說：「希望大家集中佢個人嘅嘢，佢先係主角，佢好年輕，唔係好識世面，希望今次攞到經驗！」
文：影視組