身教四子女徐子淇24個鐘唔夠用

徐子淇與李家誠的首名愛情結晶品於2007年出生，長女李晞彤今年已經9歲，此後子淇再為李家誕下二女晞兒、三子俊熹及四子建熹。貴為千億新抱，但子淇照顧小朋友絕不假手於人，她每日的時間表與一般母親無異：早上帶俊熹上學、然後陪小建熹到公園散步玩樂，下午則接女兒放學，還間中讓他們吃零食：「有時放學會買雪糕、薯條同蛋撻畀佢哋食，小朋友讀書已經好辛苦，應該適當畀佢哋輕鬆吓，返到屋企陪佢哋做功課，但我唔想佢哋太依賴我，所以依家叫佢哋自己做，做完再幫佢哋睇。」

三子唔做功課？難搞！

子淇透露三子俊熹特別難搞，為糾正他，不惜「大義滅親」：「雖然佢依家係讀幼稚園，但都有中、英、數功課要做，但佢成日都唔做功課，鬧又唔得、氹又唔得，有次我收起佢本功課，寫咗張字條畀佢老師，我話李俊熹唔肯做功課，請教老師應該點樣懲罰佢？之後放學返嚟，佢第一時間就做功課先，所以小朋友係冇得逼，用適當嘅方法，佢明白就自然會做。」

最令子淇欣慰的，莫過於看到子女成長。	大女晞彤	二女晞兒

自認偏心大女孻仔

子淇自覺對俊熹特別嚴厲，因畢竟是第一個兒子，希望培養他堅強獨立，但對着孻子建熹則又攬又錫，笑言可能孻仔孻心肝，又認為建熹性格與她很相似，故特別投緣，問可會偏心？她笑說：「我覺得我對大女同細仔會偏心少少，其實啲人成日以為我哋會偏心仔，但我同Martin都好緊張兩個女，可能覺得係女仔。其實我爸爸都偏心我妹妹，妹妹結婚時佢喊咗好耐，又致咗好耐詞，話唔捨得佢，但我結婚佢只係講咗5分鐘嘢咋，所以我妹妹結婚時，我就肯定爸爸係偏心佢。」子淇幸福滿瀉，但仍會呷爸爸醋，不減當年的孩子氣。

三子俊熹	四子建熹	2007

帶二女探訪學珍惜

早前她到尼泊爾做探訪時，特別帶二女晞兒同行，她說也許因晞兒排中間，性格較斤斤計較，希望她透過探訪有所領略：「二女刷牙成日唔閂水喉，話極都唔聽，帶過佢去一次探訪，見到人哋家園冇水，返到嚟就識閂水喉，因為我哋每日起身開個水喉就有水，根本唔明白冇水係點。有時真係要畀小朋友睇到比較，佢就會珍惜。」令子淇感到安慰的，還有小晞兒另一次改變：「之後返到香港，我帶佢去買波鞋，因為佢對腳大咗，對鞋有啲迫，點知去到佢突然喊，話諗番災區有個小朋友隻腳好大，但要着住一對好細嘅鞋，而自己對鞋只係有少少迫就可以買過，原來有啲嘢佢一路記在心。」

幻想一日36小時

子淇透露每晚一家人都會同桌吃飯，子淇亦會趁機教孩子餐桌禮儀：「佢哋有時食到天一半地一半，又食到好污糟，我每日都邊食邊教。」照顧四個孩子佔去子淇不少時間，她每晚都要待孩子睡覺才有點私人空間，她表示時間非常不夠用：「我成日諗，如果一日唔係得24小時，係36小時，咁我就可以做多啲嘢！我只有搭飛機嘅時候先可以靜靜哋睇書，但我唔會後悔，因為我唔想錯過佢哋成長嘅階段，希望喺佢哋人生最緊要嘅時刻，會有我同爸爸喺身邊。」金錢買不到時間，千億新抱徐子淇也不過是個單純平凡的母親。

首胎200磅愈生愈瘦！

已是四子之母的徐子淇，身形比不少少女更苗條，她稱自己是易胖易瘦的體質，於2007年懷長女晞彤時，體重高達200磅，腰圍38吋，明顯比去年生孻子建熹時肥得多，問到何以愈生愈瘦？她笑言畢竟第一胎沒有經驗，而帶孩子便是最佳減肥運動：「嗰陣成200磅，生完又飲好多雞湯。（點Keep番？）湊小朋友成日走嚟走去，平日如果唔需要搭車嘅路程，我都會盡量行路。以前喺外國讀書，我每日行8,000步，行到對波鞋底都爛，依家有時我都會自己行路。（同埋保鏢一齊行咪好大陣仗？）保鏢會行遠少少嘅，其實我哋啲保鏢係因為記者先有，最初我同老公拍拖時都冇保鏢，我哋有次去美國都冇保鏢，嗰次仲遇到飲醉酒嘅人，我仲同Martin講不如跑添，哈哈！」

最愛波鞋牛仔褲

飲食方面，子淇自言是個「飯桶」：「我朝早一定要食飯，如果唔係抱個仔都冇乜力；午餐我乜都食，漢堡包、薯條，得閒就食零食，我個零食櫃嘅零食仲多過仔女嗰個。」吃得隨意，打扮同樣樸素，她說帶孩子最方便莫過於牛仔褲和波鞋，有時連老公子女都想她扮靚：「平時唔鍾意化妝，比較着重護膚；阿仔如果見到我化妝着裙，會讚我靚女。我覺得衫真係唔使買太多，好快就過季，你可以留意潮流知依家興乜，但唔需要全部買晒。」子淇愛穿平民連鎖店的平價服飾，認為款式多且價錢相宜，她最愛上網購物，方便又便宜！

最愛平民餐貴嘢唔健康

大家都好奇作為豪門媳婦，是否餐餐鮑參翅肚？子淇自爆吃得平民，最愛家常菜和零食，更和子女「分甘同味」：「有次夜晚個女話肚餓，我煮咗個公仔麵畀佢，佢話好好味，叫我成日煮畀佢，我話食得多冇益，間唔中食就得；我食嘢好平民，蒸水蛋、蕃茄蛋、青瓜炒肉片、湯水係雪耳煲蘋果、蓮藕湯，燕窩又話唔好食太多，魚翅又唔食，其實貴嘢唔健康。」

後記密實袋當化妝袋

徐子淇口中的簡約生活，並非吹牛。訪問當日，她坐下自行補妝時，拿出用密實袋盛載的化妝品，問何以用密實袋做化妝袋？她說：「方便嘛！我平時都唔化妝，唔係太多化妝品，護膚品就多啲！」真心詫異！訪問前，子淇笑言經常肚餓，故點了些小吃，但食物來到後，她只吃了一口便說要先工作；訪問一直到晚飯時間，丈夫李家誠打了很多通電話來，表示等她回家吃飯，兩人就如普通家庭的夫妻相處，真實自然。訪問結束，子淇提議把食物打包帶走不好浪費。凡事真的不應只看表面，正如子淇所言，有時候大家看到的都很單向。眼前的千億新抱，其實堅貼地。

文：名人組