心穎BB慳妹搭港鐵掃平衫

上位姐仔黃心穎近年密密拍劇兼出席活動，荷包進帳不少，但依然不改慳儉作風，日前下午5時多她在尖沙咀出席活動後，即單拖到附近Coffee Shop坐低飲杯茶食件cake，之後心穎BB大熱天時唔搭的士，寧願行幾條街去坐港鐵，與放工人潮逼餐飽。

未幾心穎途經商場看見平民化時裝連鎖店，立即入內左揀右揀，火速掃了不少數十蚊一件的抵買衫，見她付款後手持大袋戰利品步出，繼而再意猶未盡地行藥房，精心挑選不少個人護理用品，心穎BB在商場滿足晒購物欲後，隨即到附近的街坊酒樓會合屋企人食晚飯。