沈卓盈（Jess）與陳自瑤（YoYo）私下原來是好朋友，雖然YoYo已為人母，而Jess則單身，而且一個熱情一個慢熱，似是兩個世界的人，卻意外地非常啱傾。YoYo笑指Jess性格心急，經常即興約會，但轉頭竟然「放飛機」，令她不知好嬲定好笑！

J：沈卓盈 Y：陳自瑤

Jess性格開朗健談，很容易與人熟落，相對之下，慢熱YoYo不會主動識新朋友。慶幸Jess主動撩傾偈，才令兩個世界的人擦出友情。

J：我哋其實都識咗7、8年，有一年公司要影花卉，影嗰陣我哋都唔熟。雖然喺公司就成日見，但傾偈就少啲。

Y：嘩！你仲記得！我都唔係好記得我哋係點識，不過你講一講又有番啲記憶。

J：我仲記得影完我哋一齊走，見你好似有啲唔開心，我就鼓勵你。

Y：因咩事唔開心我都已經唔記得喇，不過冇諗過會同你做到好朋友。

人妻YoYo與單身的Jess各有各忙，但每次走在一起都會講扮靚心得，因為兩人自認仍有少女的心。

Y：自從結咗婚，就變得深居簡出，而且要照顧小朋友。

J：以前你未結婚，大家就多啲時間傾心事。

Y：雖然依家唔係成日見，但係每次見面都好多嘢講，唔會生疏。

J：間唔中食吓飯啦，真係唔係好常見。

Y：以前都會約埋去做gym、食下午茶。

J：你未結婚時，都會同我講吓同男朋友嘅事。

Y：其實我哋都唔係好講感情事。

J：係，我哋仲有一顆少女心。

Y：都係講扮靚、食嘢同埋邊度做運動、跳舞咁。

兩人感情要好，就算YoYo不喜歡Jess經常失約，但仍無損兩人的姊妹情。

J：我個人比較熱情，好容易就同人熟，撩你講嘢真係唔出奇。

Y：係囉！我個人就比較慢熱，有時你講嘢快到我都唔知你講咩。

J：我份人比較心急啲，你就鍾意慢慢聽、慢慢講，而且會花好多時間去諗。

Y：你成日講嘢講得咁快，我點同你溝通呀？

J：我份人唔止心急，仲好易同人熟，好易同人做到好朋友。

Y：係！我就比較慢熱啲，要慢慢同人傾偈先可以做到好朋友。

J：可能就係咁，一凹一凸先可以做到好朋友。

Y：不過呢，有樣嘢真係頂你唔順！

J：有咩？係咩事？

Y：你份人真係太急，有時突然之間話約就約，我又有小朋友，唔係即刻就可以出嚟。

J：咁我揸車經過你屋企附近嘛！咪睇吓你得唔得閒囉！

Y：你call得我咁急，我即刻換衫出嚟。點知我搞掂晒，你竟然同我講你走咗！

眼見YoYo婚姻美滿，Jess未有羨慕，因為知道緣分冇得急，要來的始終會來。

J：見你依家有幸福家庭，我真係好開心。

Y：你覺唔覺我喺你面前好少講小朋友嘅事，因為我覺得呢啲事要搵啱對象講。

J：其實我又唔會特別羨慕你，我覺得我未遇到啫。

Y：你想唔想快啲結婚？

J：冇特別去諗，依家自由自在都幾好，唔使顧咁多嘢。話時話，我真係未見過你個女。

Y：哈哈哈！你約啲時間約得咁突然，我好難就o架，而且帶小朋友出街要準備好多嘢。

J：見你咁幸福，我都好開心。

Y：你心唔心急結婚？

J：又唔會，緣分呢啲嘢，話嚟就嚟o架啦。

Y：咁有對象會唔會公開？

J：哈哈！你問我咪講囉。

Y：我份人比較保護自己，但你令我安心，要keep一段友誼咁多年其實好難o架。

J：雖然我好易同人熟，但我想同你講「I Love You」，哈哈。

問Jess若果要與YoYo老公王浩信演激情戲可會接受？Jess笑謂：「你咁都諗到呢個問題！不過我覺得工作就係工作，唔會尷尬。」她又向YoYo說：「放心，我幫你(目及)實佢。」YoYo亦表示不介意：「對手唔係男人就係女人o架啦，係佢我仲放心。」

文：影視組

場地：ISLAND SEAFOOD OYSTER BAR STEAK & GRILL