王敏德眼淺型爸恨抱孫

51歲的王敏德曾經說過，第一眼看見太太Janet時，就覺得她很美，嘴甜的他更向對方說：「我覺得我們的孩子會很美！」成功抱得美人歸。太太Janet為他誕下長女王曼喜（Kayla）、二女王麗嘉（Irisa）及兒子王躍穎（Kadin）。

提到三名子女，Michael臉上帶點傻傻的害羞笑言：「睇住佢哋大，時間過得好快，唔想咁快！」問到有何難忘回憶？Michael說：「都係同普通爸爸一樣，我印象中有三次對佢哋好惡，應該係每人一次。事後自己都有諗，係咪惡咗啲呢？但我基本上都好隨和，好易開心，個女寫生日卡畀我，我睇到就會忍唔住喊o架喇！」說時眼淺的他又眼紅紅，流露真‧感動。

不捨囡囡赴美讀書

Michael指仔女都是獨立的小朋友，不用他擔心，他亦相信孩子選擇的路並由衷祝福：「無論佢哋做乜嘢我都會好支持，只要唔係犯法事！我其實好期望做grandfather，我有朋友已經做咗，我問佢哋抱住孫仔感覺係點？會唔會好似抱住自己BB咁？我好想感受。我同Janet都唔介意做工人，幫佢哋湊！」Janet聞言笑說：「我唔想（抱孫）住喎！其實佢思想仲傳統過我，仲眼淺過我。佢之前送二女去美國讀書，走嗰陣揸車去機場，打畀我喊到豬頭咁，睇啲女寫畀佢嘅卡又喊，哈哈！」

Michael（左）直言恨做grandfather，更不介意為仔女湊B。	Janet（左）大爆Michael常被兩名女兒寫的卡整喊。	仔女快速成長Michael卻像吃了防腐劑般，不留歲月痕迹。

鼓勵囝囝拍多啲拖

有個俊朗daddy，令不少人十分羨慕，但二女Irisa卻不以為然：「我覺得好普通，學校老師見到daddy張相話佢好靚仔，我話係咩？不過佢後生嗰陣都ok嘅！」Kayla亦認為daddy是位緊張爸爸：「佢會叫細佬識多啲女仔，但就好擔心我哋會畀人蝦、佔便宜。有次我講大話去跳舞，佢打畀我，我冇聽，之後返到屋企佢好嬲，掟爛我部電話。我冇嬲佢，知佢係擔心我，但就好心痛部電話爛咗，哈！」Kayla和Irisa均表示，在父親身上學到做人要有夢想，這樣生命才有意義。孩子漸長，有自己的路，可沿途上，永遠有型爸展翅拍翼的庇蔭！

採訪：Ada Lam　

攝影：張福宏