阿倫笑關淑怡人如其歌難得有情人
譚詠麟（阿倫）昨日與關淑怡（Shirley）及王馨平等出席著名填詞人向雪懷作品演唱會記者會，風趣的阿倫趁Shirley感冒纏身兩度開玩笑，以「歌係跟人」形容對方的金曲《難得有情人》，搞到Shirley木無表情冇厘心機，公然被取笑的她直言感情上需要祝福。
《2016香港夏日流行音樂節．向雪懷一生中最愛作品演唱會》將於8月12及13日於紅館舉行，有份演出的譚詠麟、關淑怡（Shirley）、王馨平、林志美、吳國敬、太極樂隊及鄺祖德等昨日出席記者會，主角向雪懷為答謝眾人逐一送上新書，接過的阿倫笑說：「今日跑馬喎，係經（馬經）嚟。」帶病上陣的Shirley準備行上台時，阿倫又發揮搞氣氛本色，重提她在個唱甩鞋一事：「我驚佢又甩鞋。」
等囝囝介紹
大會準備了一些有歌名的紙牌讓一眾歌手拿着合照，當Shirley解釋為何選唱《難得有情人》時，阿倫衝口而出說：「歌係跟人嘅，聽個歌名就知啦！」令Shirley相當無奈兼冇表情，事後阿倫笑言是開玩笑：「佢知我玩同關心佢。（介紹好男仔佢識？）唔會，緣分嚟嘅，唔做媒人三代好，到時佢個仔會介紹。」
Dry爆求祝福
受訪時，戴口罩的Shirley被問到會否嬲阿倫？她說：「由得佢，佢搞笑啫！需要佢祝福。（想搵個情人？）冇諗過。」問到若遇到心儀對象會否發展？Shirley大方說：「唔會諗呢啲，大家唔好畀校長（譚詠麟）影響到。（好難搵另一半？）隨緣啦！」而早前自爆與陳慧嫻有過一段情的鄺祖德對於遭網民狠批，他說：「每個人都有講嘢權利，會將負面變成動力。」問到是否同性戀者？鄺祖德不置可否說：「唔需要Comment。」並透露目前單身。
文：音樂組
攝：劉智源