泳兒爬出谷底 同負面新聞鬥長命
泳兒（Vincy）出道初期獲公司力捧，原以為一帆風順，但之後唱歌事業步入樽頸位被一沉百踩！嘗過高低的她誓要跟不利傳聞鬥長命，深信時間會還真實的自己一個公道，轉型成功更讓她拾回在樂壇奮鬥的勇氣，向紅館開騷之路進發。
好歌難求 不停玩突破
Vincy在新秀歌唱大賽奪亞軍，比當年冠軍的鍾舒漫先一步出道，甫出道已登事業「頂峰」，但之後因未能推出如《感應》一樣的大熱歌曲，令歌唱事業漸停滯不前，更打沉她的信心。
「我入行嘅時候好幸運同順利，揀歌方面誤打誤撞揀中大家鍾意嘅歌。頭兩、三年所有嘢都順利，去到中間有就有樽頸位，有少少因為個頭開得好，但接唔番之前道氣。好多人都想我搵番首《感應》或者《花無雪》呢類型嘅歌，但真係好難。我期間不停試新嘢，但唔係每次試都成功。我試過電子音樂同跳舞，會覺得冇嗰段時間磨練同經歷係唔會有依家嘅我。中間嗰段低潮唔係好想出街，會覺得做乜個個都唔接受，唔知做乜好。喺嗰段時間唔係好識表達自己，做呢行係要有耐性等待，千祈唔好因為未達到想要嘅嘢而放棄。今次好大膽咁跳舞又染髮，都好大突破，始終唔係跳舞出身，唔係因為嗰啲磨練鞭策自己，未必跳到嗰隻歌。其實之前中間被遺忘嗰段時候都有跳過其他舞，只係效果冇今次咁好。」
性格率直 唔識討好人
事業不似預期，負面新聞亦逐一湧現，面臨雙重打擊的Vincy反省問題所在成因，最後決定交由時間證明，實行與負面新聞鬥長命。
「有段時間係特別難受（口架） ，好似話同公司邊個唔啱或者話我寸呀，可能我同Sherman（鍾舒漫）一齊同枱食嘢，但有一秒冇傾偈或者冇望對方就話我哋不和。初初都覺得有啲難受，因為驚大家見到新聞會以為我就係咁，同埋都怕有份被報道嘅人會誤會我。後來都係時間沖淡一切。我會諗點解人哋咁寫我，真係可能自己太靜，靜到大家唔了解我。我個人比較慢熱，諗嘢好直，講嘢唔夠圓滑。同埋比較蝕底嘅係我唔識討好人，如果我有呢個特質係會順風順水啲。我喺低潮中遇到一啲共事嘅人，第一眼就知佢需要我討好佢，但我唔會做覺得自己唔舒服嘅嘢。我會真誠讚美人，唔會為咗討好而特登讚你，時間會證明到你係咩人，呢行係有少少鬥長命，嗰段時期諗通就冇嘢。」
迎接機會 自信返晒嚟
當年面對事業樽頸位，Vincy被公司安排出發燒碟，有人認為歌手於流行市場失去席位時才轉出發燒碟，然而Vincy不覺自己的音樂路走到尾聲，反而一個轉令她重拾勇氣。
「依家市場唔同咗，以前藝人要係superstar，依家要親民，好多嘢係唔同。好似Joanna Wang（台灣歌手）都唱好多翻唱歌，但唔會覺得佢唔掂，只係佢有自己風格。我由始至終都知自己唱翻唱歌，但唔會放棄唱新歌，係咁啱公司都開label出Hi-Fi碟，我諗佢哋係覺得我幾適合咪試吓，試咗第一隻反應唔錯，會係一支強心針。喺我迷惘、好似做乜都唔啱嗰陣，突然出隻Hi-Fi碟而大家接受，個人嘅自信都會返嚟。」
找到方向 盼紅館開騷
出道10年，Vincy雖然試過跌入事業谷底，但終重新找回自己的方向，希望有天能在紅館開個人演唱會。
「因為我由細個睇DVD已經覺得呢件事（紅館開騷）係好高嘅成就，如果真係有呢個moment我諗我會喊到癲咗。有時睇人哋演唱會由台下升上去嗰一吓覺得好震撼都會喊，因為覺得佢喺背後付出咗好多嘢先有呢一刻。」
後記：香港樂壇未死
《感應》可謂Vincy的代表作，然而佳作難求，她亦不再強求：「依家好多歌手派咗歌都冇人知，係幾令人心灰嘅一件事。」經常聽到別人說樂壇已死，但你有否認真去留意現今樂壇的歌曲？只要用心細聽，當中不乏滄海遺珠。凡事是相對，面對大眾的不重視，歌手又怎能提起勁做好音樂？但Vincy希望以努力喚醒大家，樂壇依然有一班用心唱歌的人，香港樂壇仍未走上末路。
口述：泳兒
筆錄：音樂組
攝記：吳文聰
髮型：Ziv.Y（www.pi.4.com.hk）
化妝：Miko Wong（Cyrus Lee Team）
服飾：Zalora