藝人林芊妤（Coffee）身處峇里參加由網絡頻道舉辦的真人騷節目《asian hot angels》，與各地美女玩遊戲爭奪獎項。昨日，她上載一張照片展示傷勢，穿運動Bra Top的她背部及腹部都有血痕，明顯被人用力抓傷！她留言：「點解又係我？玩遊戲啫！你唔使用手指甲啩？不過今日贏晒4個好污糟又難玩嘅Games，雖然食咗好多泥，但佢哋都話我好Tough。其實因為我係男人，我冇咁容易被擊倒，就算成身傷都會繼續忍痛下去！Hong Kong Fighting！」Coffee受訪時透露玩遊戲期間被來自印度的參賽者弄傷，但沒有責怪對方：「可能佢見我跑得快就用力抓住我。（擔心留疤？）驚呀！我聽日要影相，成身傷晒唔係咁好，但我啲隊員唔係咁運動型，佢哋派我出去，我只好盡力！聽日盡量用遮瑕膏遮傷口啦！」