關心妍拉埋「雞蛋仔」上堂學餵母乳
現年36歲的關心妍（Jade）婚後追B足足7年終如願，現懷女胎8個多月，預產期為下月中，為紀念首次當媽媽，她日前晒又圓又凸的巨肚，偕老公楊長智（Jonas）拍攝大肚寫真，見Jonas的笑容比準媽媽更為燦爛，相信準爸爸十分期待跟這位「前世情人」見面。
Jonas得知Jade懷孕後對太太更加愛護有加，早前被太太的朋友們改花名為「雞蛋仔」，昨日Jade接受電話訪問時解釋：「我有咗BB後，有次突然想食雞蛋仔，老公立即話去買，但嗰晚好夜，啲雞蛋仔舖頭都閂晒，我話返屋企唔食啦，點知佢堅持去搵第二間，仲冒雨去等人整雞蛋仔畀我，佢買到後笑得好開心，其實我睇見佢咁錫我仲心甜，不過老公就畀人笑，叫佢『雞蛋仔』。」
護妻幫推job
據聞Jade公布懷孕消息後，Jonas以「怕老婆辛苦」幫Jade推了多個嬰兒產品廣告及外地商演，少賺逾百萬，令其唱片公司高層很「肉赤」，Jade說：「聽唱片公司講係有好多廣告搵我，但老公話唔好拍住，之前我只係接咗一個廣告，其他商演真係做唔到啦，真正損失幾多錢我就唔知，但係依家囡囡係最緊要嘅。」問到是否已為囡囡改名？Jade稱BB會跟老公族譜排名：「有個『榮』字，依家仲諗緊，要同長輩商量，希望喺佢出世前改好，英文名跟番我哋會用『J』字頭，但想個英文名特別啲。」
Jade又稱已為臨盆做好準備，除和老公四出搜購BB用品外，又上母乳育嬰課程及閱讀相關書籍及資料，她說：「我仲向餵母乳嘅媽媽請教，覺得餵母乳可以畀BB最全面嘅營養，最重要係建立親密嘅親子關係。」
文：音樂組