何傲兒見過鬼唔怕黑 圈中尋愛

離家出走

2007年參加香港小姐、奪得「旅遊大使獎」的何傲兒（Lily），一直備受無綫力捧，去年轉換新環境，正式離別陪伴自己七年成長的娘家。Lily坦言簽約新公司充滿挑戰，要比從前多出一百二十分的努力去工作！

「當初去到份約差唔多完嗰陣，嗰一刻我覺得不如去一個新嘅環境試吓。嗰陣我都知道，可能有傳過一啲唔係事實嘅新聞（指緋聞），但橫掂係唔係都會傳o架啦，所以呢樣已經唔係好考慮嘅嘢！So far依家都OK，自由度好大，好多嘢都要靠自己，更加知道唔可以偷懶。之前舊公司係一個大家庭，好多嘢都係組織好畀你，你只需要跟住個指示做就得；但係嚟到呢度，要重新調節心情同埋磨合，但都開心嘅，因為可以睇吓自己發揮嘅嘢有幾多，所以真係比之前更加勤力。」

何傲兒（左二）收身成功，曾行過時裝騷。	為了保持美好身段，何傲兒盡量吃清淡的東西。	曾拍過不少無綫劇集的何傲兒，立定決心向外闖。

唱作路線

從前在無綫專注拍劇及主持工作，轉投新公司後，隨即宣布加入樂壇，更會親自作曲！她坦言會向歌影視三線發展，一來可以做自己喜歡的事情，二來是希望可以做多點實事，令大家更加了解何傲兒！

由港姐到藝員再到歌手，何傲兒不斷自我挑戰。	何傲兒與周子揚由愛變恨，最終反面收場。	何傲兒慶幸遇挫折時，有家姐何傲芝陪她共同面對。

「依家每日都會練歌同彈鋼琴，我希望可以做更多嘅實事畀觀眾睇，其實我都作咗首歌，仲執緊，好快大家就會聽到。我好鍾意唱歌，亦都鍾意拍劇，演繹一啲自己冇做過嘅事情同角色，係一個夢幻嘅世界，覺得係一件好enjoy嘅事；至於喺台上面唱歌，好似乜嘢都唔使諗，只係專注喺唱歌方面，各有各開心嘅。」

易肥易瘦

去年Lily為行泳衣騷而刻意減肥，Lily認真向大家公開減肥餐單，希望可以讓更多有意減肥的朋友，擁有完美身段，並承諾會積極裝備自己。

「我易肥易瘦，之前接咗個泳衣騷，嗰陣就食雞蛋同雞胸肉，跟住食菜，連淺綠色嘅菜都唔食，因為淺綠色嘅菜有糖分，其實嗰陣係戒澱粉質，真係瘦得好快，但皮膚始終會乾啲，會甩頭髮。我依家肥番少少，我鍾意咁樣，鍾意自己有少少Baby fat，公司畀我學跳舞，不過唱快歌跳嘅舞唔係好識，我本身鍾意跳慢舞，好優雅嘅舞，所以要練多啲拍子。」

有失有得

去年與周子揚分手後，鬧出不少風波，最終Lily與姐姐何傲芝向對方發出律師信，要對方公開道歉。雖然失去感情，卻贏得與家人的關係更加團結。揚言對愛情好傻好天真的她，「唔會見過鬼怕黑」，不抗拒再與圈中人拍拖！

「之前嘅事令我同屋企人嘅關係更加團結。不嬲同屋企人關係好好嘅，爸爸對我嘅愛護係寵我，唔係縱我，我覺得係有分別。我覺得OK嘅，邊一個父母唔想陪自己仔女多啲？我都好開心有時父母可以陪喺我身邊，支持我。依家擇偶條件係要善良同埋真誠，我唔會怕咗同圈中人拍拖，每一個行業都有適合自己同埋唔適合自己嘅人，只係相處嘅問題，同自己夾唔夾。如果我識到一個相處唔錯嘅朋友，帶畀屋企人去傾吓偈係一件好正常嘅事，可能我屋企人都想知道我同乜嘢人相處，不過隨緣啦。」

文：林倩怡

攝：李柏儒

場地：Schnee German Restaurant

髮型：Chris Chan＠Leighton aveda