Bingo互笠高帽通頂練舞
青春是少女的本錢，然而新進女子組合Bingo擁有的不單是年輕活力，還有從小苦練的一身好「舞功」，希望憑這種優勢在樂壇闖出一片天。每位都是各有所長的女生，矢言不會互相比較，反而是互相學習，在訪問時更一度互笠高帽！
新人為突圍而出各出奇招，新進女子組合Bingo由一班平均年齡22歲的少女組成，成員Carmen、Gia、Christy、Odilia和Kylie銳意靠「舞」功在樂壇闖出一片天。
在新歌《Crush On You》MV中，不難看出她們的舞步零舍齊，原來在拍攝時經歷過兩次通頂，Odilia說：「雖然我哋大家都有舞蹈根基，不過就算我哋各自跳得幾好，整體效果唔齊嘅話，成件事都唔會好睇，所以我哋呢方面下特別多苦功，好多細微位要執。」
她們笑言這次拍攝非常深刻，Carmen大爆擅長跳拉丁舞的Christy原來是「鐵人」：「我哋拍咗兩晚通宵，之後佢第二日要比賽，正常人都會好攰啦，但佢竟然喺比賽上拎咗個冠軍。」Kylie也笑指：「佢唔使休息都可以比賽！」Christy當然並非浪得虛名，曾代表香港參加東亞運動會。
五個女生各有所長，好像被成員一致認定是「大家姐」的Odilia，能彈得一手好鋼琴，目前已考獲演奏級數。而Carmen則柔軟度特別高，Odilia回想當時對Carmen的第一印象：「我哋幾個女仔未認識之前，去Casting嗰日撞到Carmen，即刻嘩一聲，覺得簡直係女神。因為佢跳中國舞，又跳jazz，又做到擘腿！」
圍埋講男仔
至於Gia則是大家眼中最嬌滴滴的一個，她自爆聲線似卡通人物，還即場示範卡通聲說出「嗱！等我變身先」；而Kylie曾在紐約修讀時裝設計，對衣着打扮特別有觸覺。五個女生來自不同的背景，因為一次試鏡把她們連在一起，Christy笑言起初大家對彼此很好奇，現在則無所不談：「一開頭唔係好熟，話題主要圍繞跳舞，大家分享唔同經驗。依家我哋會講咩？梗係講埋啲男仔囉！」
服裝：Novelty Land
化妝：Kings Makeup
髮型：Chris＠Leighton AVEDA
場地：L Hotel
文：張敏妍
攝：劉智源