陳奕迅凌晨跑街扁嘴戒零食
下月就42歲的陳奕迅（Eason），最近在太太徐濠縈督促下積極開始減肥，展開「認真mode」的Eason完全唔講得笑，日前凌晨一點獨自於跑馬地夜跑，做完運動後入到便利店更堅持忍口，行遍成間舖扁晒嘴的他只買了一支水解渴，拒絕零食誘惑。
陳奕迅近年減極唔瘦，身形愈來愈脹爆，與喜歡運動、被人稱為「肯亞徐」的太太徐濠縈相差甚遠，為免老公因肥胖而影響健康，徐濠縈近來魔鬼教練上身，督促老公認真減磅，兩公婆不時孖住做運動，而撻着「認真mode」的Eason今次亦相當投入，除了跟黃佩霞學瑜伽及踩單車，近日更獨自展開夜跑。
托頭徘徊零食架
日前凌晨一時許，着住公仔Tee加運動褲的Eason現身跑馬地，一身大汗完全是剛做完運動的樣子，只見疲態盡露的Eason入到便利店後對着琳琅滿目的零食，托晒頭兼扁晒嘴。他於零食架徘徊了一陣，最後都選擇忍口，買了一支水，然後挑選雜誌。為免辛勞運動的結果白費，Eason最後都只買了水和雜誌，返回座駕慢慢飲。
徐濠縈中環歎美食
至於向來fit到爆的徐濠縈則沒有減肥煩惱，不時相約友人聚餐，日前晚上九時多，扮到靚靚的她和一眾友人於中環歎美食，食完飯後更插晒袋地和友人站在街頭吹水，期間她笑到見牙唔見眼，心情相當不俗。
文、攝：追蹤組