戴蘊慧豪擲4,500萬曼城掃8單位
現年47歲的索媽戴蘊慧向來投資有道，多年來買賣「磚頭」都眼光獨到，去年更趁樓市未跌售出中環半山豪宅，勁賺1,400萬！今年香港樓市低迷，她決定轉戰英倫，在當地狂掃8個市值約共4,500萬港元的豪宅單位，變身大業主做「豪宅女王」！
全球經濟疲弱，香港樓市亦不能幸免，令愛投資買樓保值的藝人卻步，但亦有不少人將目標擴展至海外樓市，吼準時機出擊！最近有來自地產界的消息，指有香港女藝人斥巨資在英國曼徹斯特購得The Sky Gardens多層豪宅，據知這位藝人正是退隱娛樂圈多年的「隱形富婆」戴蘊慧（真真）！
淨係落訂都要800萬！
真真去年在樓市獲利過千萬，當時已向《東網》透露有意在英國曼徹斯特置業，事隔不足一年，她已付諸行動在當地「掃磚頭」！記者昨日向她求證，有指她豪氣地狂掃多層Apartment，真真透露剛從泰國回港，自言最近有開心事，所以專程到泰國拜神。問到開心事是否在英國置業？她大方承認上月底到當地簽約做業主：「係呀！我早幾個月去咗英國，去探喺當地讀緊大學嘅細仔，順便就去咗曼城睇樓盤，同當地發展商見面。（話你買咗好多層樓？）前後買咗10間，自己有8間，另外兩間係幫親戚買嘅。」問到是次投資是否過千萬？她說：「落咗訂，大概800萬。（榮升曼城大業主？）咁又太誇張！Sky Gardens入面有好多座同埋單位，我只係買咗其中一座嘅10個單位，反而好多內地人係成棟30、40間咁買，呢啲先係大業主，我呢啲見笑啦！」
嫌日本置業賺得少
提到不少藝人都轉戰海外投資買樓，為何偏偏選中在英國置業？她透露曾考慮在日本置業：「我都去過東京，睇過好多樓盤，亦做過詳細研究同分析，但始終日本多天災，唔係咁穩陣。加上日本二手樓嘅回報率唔算好高，曼城就係繼倫敦後第二大城市，好多大公司總部都遷移去嗰度，我睇好當地經濟，決定將所有投資放喺英國。」
育有兩子的真真早年與新加坡富商離婚，前夫對三母子照顧有加，而她投資房地產屢有佳績，在香港及新加坡都有物業揸手，去年6月更在樓市下滑前，將中環過千呎的物業以2,480萬售出，激賺1,400萬！
文：音樂組