37歲楊思琦高一Cup「墊」勝21歲丁悅
年屆37歲的人母楊思琦前晚與21歲歌手丁悅盛裝擔任晚宴表演嘉賓，壓軸出場的思琦以透視裝惡鬥Deep V晒玉背的丁悅，兩女更齊齊失守露墊及膠紙，年長16歲的思琦最終以34C上圍「胸」贏「離罩」34B丁悅，以Cup數取勝。
楊思琦及丁悅前晚出席網上電子貨幣開幕盛典，兩人分別獻唱三首歌曲，穿上貼身連身長裙的思琦透視上陣，更顯其身材玲瓏浮凸，可惜側身影相時左邊波底露出「缽仔糕」，大殺風景。瘦了成個碼的丁悅亦以Deep V短裙晒「事業線」，當叉腰時卻露出胸前多塊膠紙，相當失策。
由於活動上有不少富商，問到思琦會否趁機認識老闆？她說：「可能只會喺後台合照，未必識到。」對於早前被影到睇千萬豪宅，思琦說：「係朋友去睇，我只係睇裝修。（想裝修？）係，想有新感覺同換傢俬。（有意入市？）係入市好機會，如果用家就冇問題。」手持多層物業的思琦不願透露有多少層樓：「供緊o架，要努力賺錢。」
丁悅曾食減肥藥暈倒
病愈的丁悅透露食抗生素搞到頭暈暈，並承認入行時曾服食減肥藥，她說：「出道時好肥，由150磅減到110磅，係好唔健康，食咗幾個月，真係食到手震、心跳加速。」隨即自爆試過在家中暈倒：「喺媽咪面前暈低咗，不過好快醒番，又試過喺廁所暈低三個鐘，醒咗手腳瘀晒同流血，應該撞落浴缸搞到咁。」她更表示已故藝人羅明珠是其母及阿姨的好朋友：「我同佢唔熟，媽咪同阿姨識佢，佢哋幾個月去一次旅行。」
文：音樂組
攝：林蔚恩