更生歌手韓梓亮少年版監獄風雲被性騷擾晚晚返床喊！
「更生歌手」韓梓亮（TL）於2013年因與一男同志肛交後勒索對方25萬，被判勒索罪成入獄26個月。出獄後TL星夢未碎再闖樂壇，在已故江湖老竇的遺產中獲撥36萬投資音樂事業，但口頭承諾投資6位數字的Partner突因太多負面新聞而縮沙，令他前功盡廢，加上經營時裝店欠下「大耳窿」8萬元債務，無力償還，一度揚言要尋死！他接受訪問自爆坐監時被獄友欺凌，幾乎晚晚以淚洗面！21歲淪為階下囚、蒙上人生污點的他發明星夢成狂，自言屢敗屢戰，先後改了四次名，還推出歌曲《反省》，揚言會洗心革面，爬出人生谷底！
想登報脫離母子關係
本身是江湖二代的TL坦言與家人關係差，他出世的一年，父親正於獄中服刑，加上屋企涉嫌有毒品，令母親覺得他「佗衰家」，三姊弟中唯獨冷待他：「阿媽成日鬧我係乞兒、賤種！阿爸成日賭錢，阿媽就攞我嚟發洩！由細到大都未試過同佢一次正正式式同枱食飯，每次都叫我去廁所食，佢對我直情係衰過工人，連乞兒都不如！」TL更表示現在見到蟻都驚，因為曾經誤踩蟻竇搞到要洗腳，累媽咪送車尾，最後硬食一巴掌。
TL坦言自2012年爸爸出殯後，再沒有見過媽媽。問他現時可會認對方做媽媽？他即激動地稱：「唔會！我係直情想登報同佢脫離母子關係！我會用『嗰個女人』稱呼佢！佢都唔當我係仔，呢啲人一定會有報應，我唔係要佢內疚，只係想啲家長唔好咁對小朋友，搞到有童年陰影又何必？」
升上中學後，TL被社工轉介至男子寄宿學校，以為重獲自由，原來噩夢未醒。他說：「明明一星期返一次屋企，但媽咪唔畀我返，聖誕、新年長假期返去又會鬧我。」而每個月500元學校生活費，TL的媽咪竟直言無錢交，令他在初中期間受盡歧視，試過被同學將他的衣物丟進馬桶，又收過膠袋包屎做「禮物」。他又稱讀男校時被同學非禮：「我成日畀人非禮，唔係玩嗰種，玩點會瞓瞓吓有人爬咗上床度摸你？」
談及他大數生母不是，可覺得有違孝道？他竟然覺得沒問題：「咁阿媽真係對我唔好，我唔係作出嚟，我唔會作呢個古仔出嚟博同情，佢對我好衰係事實，我唔會介意人哋點講話我冇孝道。」
獄中被嘲明星仔
受負面新聞纏身的TL分別現身赤柱監獄及童年住所葵盛西邨接受本報記者採訪，服刑兩年期間，TL一直囚於赤柱監獄，對於重遊「舊地」，TL聲稱：「當時成日畀人蝦，入面好似一個社會縮影，我成日畀人蝦完自己返床度喊。」他又大爆似足電影《監獄風雲》橋段，見過有獄友被打，自己亦試過被獄友非禮。
TL又指入獄時被報章雜誌以「肛交歌手」大字報道，令他在獄中飽受歧視：「佢哋幫我改咗個花名叫『明星仔』，會講啲好難聽嘅說話，笑我『未聽過你啲歌喎』、『明星都坐監喎』！成日畀人欺凌，無啦啦推我，又吐口水落我啲飯餸度。」TL自爆有次到操場「放風」獨自坐在一旁，突然慘食獄友波餅，結果腫了半邊面要睇醫生。
住保護倉險黐線
食完波餅又被「食豆腐」，但TL坦言不敢投訴：「只會變本加厲，又會覺得你係二五仔。」最後他忍無可忍向保護組反映，因為他算半個知名人士，所以被調至保護倉：「保護倉係十幾呎嘅獨立室嚟，每日得一個鐘可以出嚟走動沖涼食飯。我日日都喺自己房做自己嘢。我嗰時就係負責貼信封，都有電視睇。住咗一年保護倉，講真個人真係會有啲黐線，長期一個人會諗埋一邊。」
曾與男同志肛交的TL被問是否鍾情男士？他強調自己鍾意女人，當時曾有一名做模特兒的女友，但因入獄而分手。
有陰影 拒接受不道德交易
TL之後再接受電話訪問，自認有人出錢「照顧」他，TL稱：「有uncle願意出錢照顧我，有人出價三萬一晚照顧費（性交易），但我拒絕晒。唔係錢問題，就算畀幾百萬我，自己都接受唔到，因為嗰件事（肛交片勒索案）我仲心存陰影，依家仲歷歷在目。唔係懶清高，真係接受唔到，情願燒炭死都唔再做！」
肛交後勒索踎監26個月
今年24歲的韓梓亮於21歲與男同志肛交後，訛稱拍下兩人肛交的片段，並夥同女友人勒索對方25萬元，最終兩人被裁定勒索罪成立，TL被判入獄26個月。
重提當年勒索案件，TL說：「嗰時爸爸過身，政府要收番間公屋，我急等錢搬屋，仲有我嗰時有三間時裝店都要錢周轉，所以我先勒索嗰個人。」因錢作怪，令TL惡向膽邊生，故他致電男同志進行勒索：「我打電話畀佢，但佢冇接聽電話，我就留言『如果你唔過數，我就報警同搵人打你。』」但他仍強調沒處心積累犯案，聲稱只是一時貪念所致。
問TL當日「行錯路」可深感後悔？他連續三次講「我真係好後悔」，覺得就算「等錢救命」也不應犯法：「如果唔係呢單案，我星途應該唔會咁難行。」去年出獄後他自資開設唱片公司「模範娛樂」，先後推出過兩首歌《TML》及《反省》。其中《反省》唱出自責心聲與重生的信念，由他親自執筆填詞的歌中唱出：「回想從前也覺討厭……全賴天父去讓我改變」，自稱因尋找到信仰而覺悟前非，更誠懇地唱出「反省」、「認錯」等歌詞，赤裸地面對過去，正面迎接各個關口的決心。他從沒放棄歌手夢，從未有想過要轉行。
被非禮兼打一巴
TL小時候在居住的葵盛西邨發生很多不愉快事件，他自言24年的人生已被男人摸過4、5次。除了獄中的經歷外，更自言8至9歲期間被街坊非禮。他憶起往事時更幾度語塞落淚。
日前TL選擇重回當年居住的屋邨，勇敢面對童年陰影。去到自己小時候住的大廈後樓梯，當年被非禮的情景即在他腦海中浮現。他說：「個中年男士帶我去後樓梯非禮，嗰陣大約8、9歲，我話唔好，佢仲不停摸。之後有人行過，我就乘機跑走。再之後有次佢話請我飲汽水，帶咗我去後山山邊，仲叫我擒入欄杆入面，如果嗰陣我擒入去實會碌落山，之後我即刻跑去屋企附近求救，啲人唔信，大叔仲同啲人講我係佢個仔，之後帶走我又打咗我一巴。」
TL愈講愈激動：「畀佢摸咗超過10次以上，自己唔識報警，同屋企人講佢哋又以為我作嘢。如果依家畀我見番佢，我一定報警拉佢！佢肯定唔係淨係非禮我一個，我只係其中一個受害者。」之後他更忍不住委屈落淚：「畀佢摸就好似私隱畀佢見到咁，依家見到大叔都有陰影，到咁多年都仲有陰影，好辛苦，有時發夢都記得。」
高皓正：呢次我冇鼓勵佢
韓梓亮4月底舉行新歌《反省》記者會，心情靚爆宣布再戰樂壇，可是5月4日卻在Facebook留「死亡預告」：「希望奇迹出現，只剩下兩日生命。」他受訪時稱拍檔憂其形象負面而臨時縮沙，拒注資6萬元，連帶投資共36萬也被拖垮，加上無力償還經營時裝店的8萬元「大耳窿」數，頓感人生沒希望而想吊頸死，後得朋友鼓勵才打消念頭，可是今日已到期還錢。他說：「因為之前冇還息，利疊利依家連本帶利要還9萬6，我申請緊銀行貸款。」
當日韓梓亮受審期間，藝人高皓正現身法庭力撐，又寫求情信及代墊全部賠款。高皓正接受電話訪問，問他是否與韓梓亮很老友？他謂：「佢發生咗呢件事，有朋友介紹，我純粹關心佢。」提到韓梓亮之前揚言自殺，問高皓正可有向對方講鼓勵說話？他說：「呢一次我冇特別鼓勵佢，我相信佢唔會做傻事，佢喺獄中都咁堅強，冇理由依家會放棄，可能係一時情緒啫。」
另外，與韓梓亮同是「江湖二代」的歌手曲赤表示，認識韓梓亮約5個月，曾一齊出席藝人團契，不過返不同教會做崇拜。因韓梓亮知道他是Rapper，所以邀請他合唱。曲赤說：「之前佢啱啱出歌，有演出機會時會見到多啲。呢期我拍戲多啲，少咗同佢做嘢，但我哋嚟緊都傾第二首合作歌，希望到時多啲jobs，大家一齊搵多啲錢。」
四個名邊個真？
韓梓亮、梁家進、梁迪斯、梁柏廷，到底哪一個才是真名？TL說：「我原名叫『梁家進』，到2011年爸爸有啲毛病，就嚟過身，我嗰時簽咗公司就嚟出道，公司就帶咗我去睇相，改咗『梁迪斯』，連身份證都改埋。」身份證改名為爸爸沖喜後，他又與當時唱片公司商討用「梁柏廷」作出道藝名，可惜未出道就因「肛交勒索案」罪成入獄26個月。刑滿後，他又改名「韓梓亮」：「今次冇睇相，我好鍾意韓國，『梓』就係木加個辛字，好似人只要努力就會建立到一舊木，努力就會發光發熱。」
文：音樂組