蔡思貝送波餅拋窒人夫

蔡思貝揚言拍親熱戲唔使向男友備案。

藝人吳啟華、蔡思貝、李施嬅、黎諾懿及賴慰玲等昨日到油塘宣傳無綫新劇《純熟意外》，思貝以低V背心襯短褲現身，上身晒「線頭」，下身露長腿，性感冠全場。她說：「係咩？諗住着型啲出席啫！我同黎諾懿有親熱戲，我有啲怕醜，因為諾懿平時好肯教人，所以感覺佢好似前輩，拍起上嚟就更加怕醜。（親熱戲要同男友麥秋成備案？）唔使，不如問吓諾懿使唔使同太太備案。」現場所見，思貝於台邊輕倚向黎諾懿身上，傾談時更趨前胸壓對方手臂，令黎諾懿企到硬晒軚。

對收視冇壓力

而男主角吳啟華表示新劇用作「打仗」，他說：「本來呢輪喺內地拍劇，TVB通知我，咁我內地戲份就得到，就返嚟宣傳，聽監製講話要『打仗』，我對收視冇壓力，依家科技進步，我阿媽睇劇都識上網，唔使限時限刻。」

胸壓臂彎 蔡思貝拋胸哄到咁埋傾偈，搞到人夫黎諾懿企到硬晒唔敢亂望！	烏身搶鏡 與賴慰玲（右）合照時，蔡思貝突然一招烏身。	吳啟華接「打仗」柯打，即從內地返港谷劇。

同場的賴慰玲可謂「劇接劇」，繼《殭》後再有新作，她說：「劇中做Madam，貼近番我性格。（傳鄭嘉穎因為讚你，而同無綫高層曾勵珍頂頸？）我唔在場，唔清楚就唔講，但聽過黃秋生有讚過我，我作為新人，有人讚即係提攜，好興奮。（乘機上位？）冇諗過，只想更加好咁發揮接到嘅角色，上唔上位唔係我考慮嘅嘢。」

文：影視組