拒再提舊情 鄧麗欣：畀時間淡忘
歌手鄧麗欣（Stephy）昨日與周柏豪出席活動，對於舊愛方力申（小方）日前公開認衰不應再重提二人過去，並道歉表示「都係我唔好」，Stephy說：「既然唔想再提就唔好講，唔需要道歉，大家都係出自真心。（近排有冇聯絡？）冇呀，畀啲時間淡忘。（即係冇彎轉？）暫時努力工作先。」
另外，Stephy坦言入行前曾服食去水丸：「食完個人好唔舒服同好『慌』，食咗一個星期就停喇！」而柏豪承認曾飲「大隻奶粉」谷肌，他說：「搞到面部同背脊出暗瘡就停飲，改去做健身，亦試過食藥增肥搞到肚屙。」
