吳業坤反擊網友：佢哋唔抵得！

工作冇底線

在2014年的無綫《萬千星輝賀台慶》中，吳業坤因「淪為」棋子被網友恥笑，雖然亦有不少人同情他，但事實上他毫不介意，更指每人都有自己的位置。對於最近加盟無綫的蔡國威亦甘願做棋，他揚言自己可以再度扮棋登場，亦樂意與蔡國威分享扮棋心得。

其實如果叫我做多次棋，For Fun嘅話都OK嘅。蔡國威都話想做？咁要睇吓邊個適合啲，或者兩個一齊做都得嘅，亦都唔會覺得叫我做棋係恰我。喺公司裏面我好多嘢都扮過，連女人都扮過，都冇乜底線o架喇！我知自己嘅位置，就算畀你唱到歌都唔代表可以捧到你去紅館，所以係咪做棋個差別都唔係好大。其實做棋都幾好，成晚都可以出現，都係一個角色啫。至於我演其他角色都「騎呢」，係因為我自己搞成咁啫。

不過最緊要都係唔好侮辱、貶低我，但的確係有呢啲聲音，好似話我係偽毒，我可能會記住，但唔會話成功咗之後就十倍奉還。我覺得佢哋自己會內疚、會慚愧，可能我用依家呢個姿態喺佢哋面前行過都可以話畀佢哋聽佢哋係錯咗。其實話我扮傻係最多，我覺得佢哋係唔抵得，亦忽視咗我之前嘅努力，唔了解我呢個人，純粹攻擊我。

最驚冇人識

吳業坤自2010年參加無綫《超級巨聲2》後，一直以鄰家男孩形象示人，但隨着事業漸穩，所背負的亦開始加重，未必如往日般率性。娛樂圈瞬息萬變，他坦言害怕點滴的成績幻化泡影，但經已計劃後着，以最壞打算，作最好準備。

扮棋	吳業坤自認騎呢形象是自己一手造成。	吳業坤遺憾沒有讀大學，但亦慶幸加入多姿多采的娛樂圈。

工作係有少少辛苦咗嘅，多咗嘢要去關注，除咗我自己嘅嘢外，依家都有啲代言，所以都要為其他人諗，唔係話做咩就可以做咩。不過始終大家都係鍾意我夠Raw，所以照Raw番我都OK嘅。不過其實我有驚過有一日再冇人鍾意我、關注我做嘅嘢，就好似聽日突然冇人識邊個係吳業坤咁，所以會有好多壞打算，如果真係唔掂嘅，咪去個Working Holiday囉，返到嚟先再算。會唔會賴死？睇吓係咪真係有呢個Talent繼續做，而我諗我暫時都仲有。

若有朝一日事業跌進谷底，吳業坤坦言會轉行。	吳業坤與何雁詩識於微時，經常互相鼓勵。	Super Girls成員Aka曾與吳業坤傳緋聞。

朋友大過天

今年26歲的吳業坤，雖然年紀尚輕，但隨人生經驗逐漸增多，已經面對不少風浪。視朋友為家庭外首選避風港的他，很感激同伴鼓勵，才令他走到今時今日。如果同伴有難，吳業坤會毫不猶豫出手幫忙。

雖然朋友唔係喺我生命中排第一位嘅嘢，但係朋友一有事，我都會第一時間去幫忙。雖然呢個世界冇話冇咗邊個唔得，但係我始終都唔想冇咗任何一個朋友，因為對我嚟講，朋友就係同伴。好多朋友都曾經幫過我，大多數都係喺有需要嘅時候就自然會出現、畀好多意見我，當我需要鼓勵嘅時候，佢哋都會鼓勵我。好似Step（何雁詩）咁，當時我同佢都係做音樂節目主持，每一個禮拜大家都睇住唔同嘅歌手上嚟，都會同互相講「我哋得嘅、我哋得嘅」。雖然唔係話咩好實質嘅行動，大家都會不斷咁鼓勵大家。好似佢出道做歌手先，我都戥佢開心。到我出道嘅時候，佢亦都好戥我開心。而我都好多時會約Cousin Fung（馮家俊）、Hubert（胡鴻鈞）同Alfred（許廷鏗）出嚟，食飯睇戲飲嘢打波去旅行咁。

拍拖變女人

吳業坤入行以來緋聞多多，但事實上卻安分等待緣分降臨。拍過四次拖的他總結「敗績」時，承認過去戀情中輕易情緒化，只在乎尋求愛侶注意，所以希望不要重蹈覆轍。

我覺得如果依家拍拖嘅係搵共度終身、互相扶持嘅人，係會遇到嘅，所以唔會特登話要去搵。同時我又覺得自己事業未發展好，因為始終要有承擔，要為對方同佢屋企人打算。緋聞多呢方面，我覺得如果真係想去了解，或者想行近少少嘅，係唔會信晒啲報道，同埋相處都會感受到我係咩人。我拍過四次拖，每次分手都係不了了之咁，大家喺一個膠着嘅狀態下，冇咗個動力去搵對方。其實諗深一層，我都覺得自己唔夠成熟，一拍拖都有啲情緒化，好容易就會發脾氣，好小事都會話對方，例如Cut線、唔覆機，變咗個女人咁。我諗我依家唔會好似一個Attention Seeker咁，依家想同對方一齊經歷。

後記：街坊爭合照

吳業坤在6年內憑努力一點一滴累積人氣，粉絲層涵蓋老中青三代。採訪當日，他在西營盤街頭拍攝，雖然經過的途人不算多，但當有街坊經過，他們總會停步向這年輕歌手叫喊：「係吳業坤呀！」吳業坤亦非常識做與他們合照，其臉上的笑容亦如6年前同樣真摯。

口述：吳業坤　　

筆錄：若瑟　　

攝影：吳文聰　　

場地：巨二麵堂