舊愛Sunny難忘開心回憶:心唔安樂!

羅明珠活躍幕前多年,婚後淡出演藝圈,離婚後她坦言不打算再婚,卻巧合地在司馬燕的婚禮中接到花球。羅明珠後來有過幾段感情與緋聞,星級排舞師黃國榮(Sunny Wong)曾與她拍拖約五年,二人分手達十年但碰面不超過五次。Sunny透過朋友得知羅明珠的死訊:「聽到都唔開心,好突然,心好唔安樂,同佢有好多開心回憶,好多朋友都好錫佢。佢個人好好、好開心開朗、又健康,好錫屋企人,特別係佢媽咪,希望佢屋企人唔好咁傷心,希望佢去到另一個世界繼續開心,有需要會幫手!」

而股壇中人莊友堅曾與羅明珠傳緋聞,他透過同事回應:「莊友堅身邊舊朋友相繼離開,佢都好唔開心,佢喺朋友間嘅群組知道羅明珠離開咗呢件事,當然係好唔開心,所以都唔想講咁多,希望羅明珠安息!(最近有見面?)少見面。(有傳拍過拖?)唔好咁講,大家係朋友。(咩事過身?)唔知!(心臟病?)都好大機會,咁後生,點會走得咁突然。(會幫手辦身後事?)作為佢朋友,需要幫手都會幫,有儀式會參加。」另外,羅明珠曾聲稱與古天樂拍拖,惟古天樂未曾回應。