歌迷求婚阻住晒!五月天超時罰款逾萬

台灣天團五月天前晚在紅館舉行個唱,大約晚上10時台下突然出現騷動,原來有男歌迷即場向女友求婚,搞到阻礙演唱流程兼超時,但超時說法不一,有指超時約十分鐘才完騷,亦有傳大會因超時而被罰款四萬元!當時阿信愕然反問:「求婚?」並笑言若當證婚要加錢,怪獸也笑言要送《你不是真正的快樂》給他們,但即遭阿信阻止!大會攝影即場拍下求婚過程,瑪莎更一度說:「今天一定會超時!」事後,有大批歌迷在討論區指摘該男歌迷自私要負責任,但該男歌迷竟在網上反問其他歌迷有否拍下照片,希望索回作留念!

個唱主辦單位UnUsUaL發言人梁先生接受查詢時承認前晚一場的確超時及要罰款:「罰咗大約萬零蚊,唔係外傳嘅四萬蚊,罰錢當然係罰主辦單位,嗰位求婚歌迷都走咗!作為主辦單位係唔希望亦唔鼓勵歌迷喺演唱期間進行私人行為,咁樣係會打亂個騷嘅流程。呢件事有好多歌迷喺網上討論,對或錯大家自有評論。」