張敬軒收13紅底擋煞
張敬軒昨日現身港鐵活動，肖猴的他自爆因今年犯太歲，獲貼心粉絲送上貼身衣物－13條紅底底來催吉避凶，更笑言粉絲成功靠目測「小軒」而買啱size和牌子！
歌手張敬軒昨日出席港鐵「開心搭．生日獎」抽獎活動，獲贈用氣球扭成的留聲機及紀念車飛。問到平日如何慶祝生日？軒仔指人愈大，愈不在意物質上的禮物：「大個發現有心思o既嘢都幾好！」二月一日生日的他更大爆今年是其本命年，因為犯太歲，所以有不少粉絲送上大紅色的襪子及內褲給他做生日禮物擋煞。
讚粉絲體貼
受訪時，軒仔坦言過去覺得內褲是私人物品，收到這類禮物一定會退給粉絲，不過今次粉絲竟然買中他的尺寸及牌子：「佢哋好似知我size咁，目測到。今年犯太歲，自己冇時間去買，咁咪算囉，又係自己用開o既牌子，雖然唔知係咪深圳羅湖城買o既，但佢哋好有心同體貼！」問到共收到多少條紅色底底？軒仔透露多達13條：「啱啱好夠換，仲有凸！有啲幾得意，有個倒轉嘅福字喺中間，福到，都係攞個意頭啫！」
佐敦站出沒
另外，軒仔表示平日要過海或在繁忙時間都會搭港鐵，並大方分享通常在佐敦站上車，灣仔或金鐘站落車，讓粉絲可以捕獲他！他又透露第一次乘搭港鐵就是1996年由廣州來到香港，當時因為人生路不熟，又不懂看地圖，所以曾迷路及落錯站。
文：音樂組
攝：鄭家俊