父女檔袋7位數 Bob誓捧囡囡做童星
無綫藝人林盛斌（Bob）為代言按摩椅品牌Ogawa獻出「第一次」，帶同大女霏兒（霏霏）父女檔演出，穩袋7位數字酬勞的Bob大讚囡囡不怯場且甚有天后風範：「佢好緊張每一個鏡頭拍得好唔好，完咗會叫攝影師畀佢睇片，有次仲話自己做得唔好，主動想再嚟多次，真係專業。」
賺外快兼親子樂
Bob笑言子女教育費日增，打趣指霏霏「搵外快」無疑可幫補家計，但自己不會當「無良父母」﹕「一定要以學業行先，其實之前都有外地嘅旅遊局想我哋去拍嘢，短短一個星期有幾十萬酬勞，但佢哋唔肯等到暑假，我即刻推咗嘞！」Bob打趣霏霏與二女熹兒都在求學，故未來將重點「力捧」孻女機兒為明日之星：「佢未使返學，時間易就啲嘛。」
今次拍廣告，Bob有機會與女兒「日對夜對」，他說﹕「嗰排好忙，冇乜見過佢，估唔到拍兩日廣告，我哋有機會一齊玩同傾偈，寓工作於親子樂。」廣告商送贈了兩張按摩椅給林氏父女，二人商量過後決定借花敬佛，母親節時轉贈給Bob媽及外母，皆大歡喜！
文：影視組