自小在麻雀枱上訓練有素的袁詠儀，誕下「魔童」後一年僅打麻雀一次，惟有感老公張智霖愈見後生，即心癢癢有意重出江湖，望刺激腦部發達回春，與老公拉近距離。

袁詠儀（靚靚）、黃佩霞及蔡一智太太周雪芳昨日為有線節目《伍姑娘真識食》擔任嘉賓，與任主持的老友伍詠薇（伍姑娘）在麻雀枱上談友情，自誇在太太堆中牌章最勁的靚靚，透露從小到大對台灣及廣東牌均訓練有素，但自囝囝「魔童」出世後已甚少接觸，由一星期三、四次，減至一年只打一次麻雀，她說：「老公（張智霖）打牌都夠囉，我唔可以放低個仔，到大個咗帶佢去打，佢會不停嚟問我嘢，又摸牌咁，唔想佢咁早學中國國粹，所以屋企張麻雀枱都入廠。」

對於另一半張智霖愈見後生，靚靚坦言有意重出江湖：「打牌對個腦好啲，老公成日話我唔記得嘢，佢就愈來愈後生，可能有呢個娛樂去放鬆，我都係時候要開心啲，咁個樣都會後生啲，拉近距離嘛！」對於被同場好友踢爆對H字品牌手袋情有獨鍾，靚靚笑指每年只買一個，家中暫收藏十多個，問到是否不再買？靚靚抵死地說：「唔同年紀對顏色追求都唔同，近年鍾意粉色，好似粉藍咁，但若果有一日見我用粉紅色就應該有啲事。」

談到夫妻檔上陣的內地真人騷節目已完成拍攝，問到會否再接拍？靚靚表示現時心態還是喜歡演戲，近日再次跟20年前的內地經理人合作，亦想再接拍內地本土題材作品，但首要是苦練普通話，問到娘家無綫可有向她招手？她笑說：「我哋好愛無綫，係就想做旅遊節目，我對食有要求，但最好係節目入面可以踩嘅。」

而伍姑娘則透露邀請靚靚任嘉賓時，曾因工作人員誤傳訊息發生小插曲：「佢哋話靚靚唔會上嚟做嘉賓，我條氣唔順就自己打畀阿靚，先知原來係佢唔想同張智霖一齊上節目啫！」她更騷出由靚靚送贈兼代表友情的鑽石戒指，笑指雙方相識廿多年，早已視對方為一生知己。

文：影視組