無綫藝人金剛目前除了經營日本水果生意外，更在中環開Cafe，中環出名租貴、競爭大，但他揚言「冇有怕」，更以自製甜品、蛋糕、曲奇及套餐作招徠，而咖啡杯、茶壺及店內設計都是他親力親為，全部都要「膠（高）」質素，他更自誇是「OL殺手」，自信在中環企得穩！

金剛諗頭多多，除了拍電視劇、電影及綜藝飲食節目外，更與友人合資搞多樣生意，去年開始，他大搞大閘蟹及日本水果生意，現時水果生意穩定。剛與女友蕊蕊分手的他，更加專注事業，近日又有新搞作，在中環威靈頓街開設Bakery Cafe，投資7位數字，由搵咖啡機、咖啡杯、舖面設計以至整咖啡都落手落腳做，凡事親力親為，金剛說：「我依家都35歲，冇時間再玩，要認真為事業打拚。今次搞Coffee Shop，因為我好鍾意飲咖啡，舖頭部咖啡機都係我親自去搵，真係不得了，半自動，唔係撳個掣就可以，要手動，咁先有感覺！」

他表示最初有咖啡機時已親自試沖，足足沖了三十多杯才似樣：「我鍾意飲濃啲嘅Americano（美國咖啡），其實好多人以為飲咖啡唔好、唔健康，其實飲咖啡好好，如果一日飲十杯梗係唔得，有啲人飲會心跳，呢個只係體質問題，我一日最少飲三杯，冇事呀！同埋我唔落糖，不知幾健康！」

裝修方面，原來都是金剛的想法，牆上桃紅色的Aloha，更與他身上的紋身一樣，他說：「Aloha係一種花，裏面包含咗愛、希望、和平嘅意思，人生最緊要嘅三樣嘢，我自己好鍾意。」中環有不少Cafe，金剛的店舖有甚麼特別吸引顧客呢？原來他專程從德國及英國搜羅咖啡杯及茶壺，外形美觀，咖啡杯的杯耳更是18K白金製造，相當特別！他說：「我希望顧客入到嚟有唔同嘅感覺、唔同嘅印象，而且我哋嘅曲奇、甜品同蛋糕都係由店長Kay親自炮製，嚟緊仲會有台灣風味曲奇餅。我本身係台灣人，好多嘢會加入台灣元素，舖頭有一款蛋糕，我喺台灣食過，鍾意到不得了，跟住就拎返嚟畀Kay試，問佢有冇辦法搞，佢試咗一星期就整咗出嚟！而且我都會落場煮嘢，整一啲自家嘅套餐。」

中環的Cafe客路都以OL為主，金剛聞言即說：「我喺OL界巿場都好大，你都傻嘅！我老少通吃！唔係我食佢哋，係佢哋食我，真係唔擔心，總之全部嘢都要『膠』（高）質素，唔『膠』唔做，總之要『膠』級！」問到會否在家鄉台灣開舖？他認為做生意絕對不能急，要慢慢來：「開分店係會，但一步一步嚟，以前自己好急，所以咪賴嘢！試過喺台灣做服裝生意，有個拍檔有啲問題，捲款而逃，唔見咗6位數字。（搵圈中人夾份？）都會傾，但真係唔想太急。」問到藝人做生意可有着數？他說：「啲人以為明星做生意淨係掛名，咁係唔得嘅，唔落手落腳就冇意思。着數真係冇乜，反而多人同你攞Discount，我唔鍾意佔人便宜，所以唔會搵人着數，反而人哋搵我着數多啲。」

金剛又分享做生意的三大宗旨：「第一：要親力親為，唔係真係冇意思；第二：對員工唔好擺架子，要當佢哋係一分子，唔好擺款，一齊做嘢最緊要開心；第三：要令顧客有感覺，希望佢哋嚟飲咖啡會感到舒服、放鬆。」

開業時間：2016年4月

開店成本：逾百萬元

每月租金：6位數字

店舖面積：逾700呎

文：誼

攝：劉斌