雷頌德：做大事總會有阻滯

黎明（Leon）演唱會的音樂顧問雷頌德（Mark），前晚開始多次透過社交網留言為Leon打氣，昨午Mark與太太出席新錶發布會時坦言：「要求高好緊要，咁多人，要最安全嘅水準。（邊個要負責任？）唔係要搵人負責，可能個個人都有責任，賴人都無好處。」至晚上六時許Mark抵達演唱會舉行場地中環海濱，問Leon心情有否受個唱首場煞停影響？Mark謂：「Leon狀態好好，做大事總會有啲阻滯，經過咗個阻滯咪OK囉，呢度要多謝啲Fans，對佢好好、好支持佢，同埋要多謝政府，最緊要快，即刻搞掂。」至於場地拆去會場的帳篷會否影響音響效果？Mark相信影響不大：「我唔知拆咗之後音量需唔需要校細，我唔知政府個規定係點，但應該OK嘅。」