李嘉欣揀小學4間夠數
「大美人」李嘉欣昨日出席賽馬日活動，透露寶貝仔Jayden快將6歲，需着手籌劃及準備囝囝入讀小學的事宜，她揚言不會大包圍報考小學，只會為他報選最多四間心儀學校，淡定表示就算落選，亦有政府學位抽籤作後盾，又坦言最想囝囝學好中文及德育。
李嘉欣（Michele）、「玩具大王」蔡志明兒子蔡加讚（Karson）、及太子珠寶鐘錶主席鄧鉅明與太太鄧宣宏雁等，昨日齊現身沙田馬場出席2016《愛彼女皇盃》賽馬日，已第三度成為「愛彼女皇盃大使」的Michele，表示會下注碰運氣，又透露5歲多的囝囝Jayden對馬有少許興趣，故有意讓他6歲時學習騎術，有助他增加膽量及平衡力。
打好中文基礎
談及Jayden快將6歲，是否現正開始為他籌劃報讀小學的事宜，Michele稱已踏入適當時候：「要準備面試，要為佢揀適合嘅學校，好多家長都畀意見我，話要大包圍報10幾間，但我未必會，會揀心儀學校，（有心水？）依家通常係學校揀你，唔係你揀學校，我最多會報3、4間，同埋政府有得抽籤，就算冇得揀都唔會冇書讀！」她續表示本地和國際學校都有中文學，希望囝囝可先打好中文基礎，現時在家中暫未教授他面試技巧，反而主要教他做人應有的禮貌：「德育好會更好，細個唔教，大咗冇得教。（會否海外升學？）香港讀得到，都想佢係自己身邊耐啲。」
鄧鉅明冇賭運
而Karson表示出世數月的孖仔Christian（大孖）和Kameron（細孖），現時很精靈及樣子十分相似，故較難分辨：「依家會着唔同色嘅衫嚟分，太太（汪圓圓）認會好啲。」又透已為孖仔改了中文名：「大孖叫靖天，細孖叫靖曦，（有冇特別意思？）冇o架，係我哋自己鍾意嘅字，睇字典搵，冇夾過師傅。（會否搞百日宴？）會屋企人自己食餐飯，唔會大搞。」
另鄧生透露自己沒有賭運及未曾試過贏大錢，反而鄧太則表示自己有少許橫財運：「我一買股票就會叫佢唔好跟我買。」
文：名人組