阿倫輸波剝舒夫真高棚牙 豪派$1,500獎金

身為明星足球隊隊員的阿倫、黃日華、陳百祥（阿叻）等，昨日於上海出席「中歐全明星足球嘉年華」的「旭日伯樂計劃盃」，火併歐冠全明星隊包括舒夫真高、馬甸尼、韋利等一眾國際球星，武打巨星洪金寶、藝人羅家英亦有到場直擊！

黃日華打埋身戰

賽事最後以1:7作結，曾笑指「要贏世界級球星，除非個波係四方」的阿倫，賽後在更衣室宣布隊員獲發1,500元「贏波」獎金！原來昨日賽前吃早餐時，球星韋利及「軍刀」舒夫真高均向阿倫下戰書，揚言各入五球以大比數擊敗明星足球隊，惟最後未能如願，故阿倫對賽果大感滿足，「得戚」笑指已算「贏波」！舒夫真高做球員時係世界級前鋒，入波多到暈，有「軍刀」稱號，但今次畀阿倫剝咗棚牙。

舒夫真高：我要入５球砌低你哋，easy job！	阿倫同馬甸尼搶波，勇呀！	阿叻同岩布仙尼扭過。

兩隊對壘期間，歐冠隊全程絕不留手，上半場舒夫真高已梅開二度，再加上韋利跟岩布仙尼各入一球，半場已領先4:0，下半場後備入替的約基亦有進帳，舒夫真高再入兩球食出「大四喜」！明星隊則在末段發圍，由「男拔戴志偉」袁振昇射破門將托度「十指關」，成功得分！隊長黃日華期間與球星簡廸拿埋身扭波，阿倫和馬甸尼亦多次互相進擊。

韋利：我都入５粒！	羅家英：豈有此理，咁都唔入！	中歐明星隊在上海對壘，賽前來張大合照。

見識世界級國腳

對於今仗感受，僅踢了30分鐘的阿倫說：「以往明星隊比賽都可輕鬆獲勝，今次對手係世界級名將，落場嘅球員都發覺舉步維艱，感覺對手無處不在，事實上對方踢得好輕鬆，好少跑動，只係意識同走位級數高，令球員知道真正世界級球技就喺咁！」明星隊將於今午回港，下場賽事暫定7月遠征瀋陽。