謝安琪不捨歌迷淚眼Say Goodbye

女神謝安琪（Kay）假紅館舉行的一連兩場《拾回謝安琪數愛世界巡迴演唱會香港站》前晚來到尾場，繼續換上多套性感靚衫演出，但由於是告別之作，所以她在台上亦相當感性。

臨近個唱尾聲，她難忍情緒以手遮眼，哽咽演唱代表作《囍帖街》。唱畢後，坐在台上落淚表示要多謝一位從未致謝過的人，她指這個人缺乏自信，不懂交際應酬，所以很少朋友，但對方十年前的一個決定，讓自己放膽去追夢：「佢經歷過好多難頂嘅事，係平常人唔想承受嘅嘢，但佢冇喺人哋批評或者身體差嘅時候放棄，堅持做自己想做嘅嘢。」觀眾原以為她是向老公張繼聰致謝，當她講出這個人是十年前的自己時，引來全場大笑。Kay即說：「做咩？有人自認呢個人？咁你哋嚟頂呢啲嘢吖！」最後唱出《跟我走》，為個唱畫上圓滿句號。

復出無期齋湊仔

慶功宴上，問到Kay為何未有在個唱上多謝老公？她笑言：「我成個人都返屋企喇喎，應該佢多謝我啦。我依家放低工作幫佢主持大局，係有犧牲o架，呢個決定唔容易。」隨後才「補鑊」指有在心中感激老公，因為有對方才能放膽選擇放低工作。她坦言對將來的事仍未有打算，甚至未決定何時復出：「所以我先咁唔捨得，咁我想返屋企啫，冇理由落一個限期嘅。我想陪小朋友，或者真係咁好彩有BB，呢段時間可以係無限期都得。」

以白色盔甲裝上陣的Kay，側面看咇出少少肉。	Kay坦言未知何時復出，故更感不捨。	張繼聰於慶功宴上，錫了老婆面珠一啖。

性感程度輸老公

連續兩晚在台下做觀眾的阿聰亦有現身慶功宴，更錫了Kay的面珠一啖，之後又上載與老婆的Sweet爆自拍照，以歌迷口脗留言：「唔執輸！梗係要同女神自拍啦！阿K，我好鍾意你o架！超級good show吖！」他昨接受本報電話訪問，提到老婆個唱上的服裝性感，阿聰笑說：「我成日喺廣大觀眾面前除衫，佢永遠超越唔到我。」

文：音樂組

攝：劉智源