馮殷美味素菜誘仔埋身

身兼演員及DJ的馮殷(Cecilia)年僅22歲,但已煮得一手好菜,她說:「我食素,加上我鍾意食嘢,有時喺出面餐廳食完,發現幾好食,就會想返屋企自己研究,唔使次次都出去食。」Cecilia愛煮西餐,最拿手整意粉及意大利飯,連甜品亦難不倒她。今次她特別炮製黑松露白汁雜菌意粉、日式芝士玉子燒及炒蘑菇,單看外表已值滿分,她表示:「我好鍾意食芝士,覺得個蛋芝士分量OK,因為太多會膩,個蛋亦好滑,個意粉我就鍾意整硬身少少,有番啲口感。」之後她笑言:「如果10分滿分,我會畀100分自己!」

Cecilia愛吃,問她可擔心食太多會變肥?她笑言:「絕對怕肥,我大半年前唔係呢個身形,依家肥咗20磅,因為我太鍾意整嘢食。不過依家學緊泰拳減肥,所以應該會好啲。」Cecilia入得廚房出得廳堂,問可會較易找男友?她坦言:「女仔識煮嘢食係吸引啲,但我又唔覺得我特別易搵男友,因為我都單身咗幾年。」