敖嘉年苦情皇帝喊到癲:演到鬼上身

敖嘉年於新劇飾演苦情皇帝,他自爆演到似足「鬼上身」,幾近崩潰,角色需要經常日喊夜喊,曾試過一次未Roll機經已投入情緒喊到收唔到聲,導演即着他「Hold住先」,不要浪費眼淚!

藝人敖嘉年於無綫正播放的劇集《末代御醫》中飾演清朝光緒帝,與朱晨麗飾演的珍妃扮演一對苦命鴛鴦。嘉年直言扮演這位慘被當作扯線公仔的慘情皇帝時,投入到臨崩潰邊緣:「為咗演活光緒同珍妃嘅一段情,我直頭演到鬼上身!到光緒死嗰一幕,我仲要演個角色出現幻覺。」其中「珍妃」死的戲更令他印象深刻:「珍妃一死,導演用長鏡頭一個Shot影到我崩潰喊爆,好彩Cut機可以慢慢抽離番。」他笑言於劇中喊戲連場,怕被定型為專演苦情角色:「記得有場講珍妃偷偷搵人帶信畀我,我一望到封信,未Roll機就已經喊!導演叫我hold住啲眼淚。(只唔只十場喊戲?)係悲劇人物,但我鍾意。(喊到眼淚乾都鍾意?)OK呀,需要咪做。(專演苦情角色?)演過《巾幗梟雄之義海豪情》『排骨仔』之後就冇,(靠喊戲食胡?)靠咩都冇所謂,最緊要唔好被定型!」

讚朱晨麗古典美

提到拍檔朱晨麗,嘉年大讚她充滿古典美:「同佢第二次合作,佢真係好適合拍古裝,感覺好古典,可能因為佢輪廓圓啲,化淡妝就好好睇。」談及該劇可能是楊怡的告別作,他搞笑地說:「阿怡係一個好低能嘅女仔,郁啲都笑一餐,但當然佢好專業!」又表示於劇中面對郭晉安時要不停「忍喊」:「同安仔首次合作,合作好舒服。有一幕佢嚟探我病,臨終嘅我心諗一定要忍住唔喊,否則會好奇怪,因為有啲場口唔需要喊,喊咗反而唔好睇。」

文:影視組

服裝及鞋履:Harrison Wong、diadora

髮型及化妝:tonnislee@HAiR、Kammy@Touch Up Group