AGA新碟獻亡姊唱走負能量

歌手江海迦(AGA)去年經歷最難過的一年,面對姐姐離世,讓她深切體會到「今日唔知聽日事」,所以更加把握時間追求自己的音樂夢,再用姐姐留給她的愛掃走負能量,所以AGA新碟《Ginadoll》都是以姐姐花名命名。

創作歌手江海迦去年飽受姐姐離世之痛,重整心情後繼續努力創作音樂,近日更推出以姐姐花名命名的新碟《Ginadoll》,以獻給姐姐,AGA說:「喺音樂嘅路上佢一直扶持我,冇佢可能冇呢隻碟!」

上了寶貴一課

與姐姐一起長大的AGA坦言,姐姐影響她最深,亦令她樂觀面對世事:「佢會好無條件去愛,就算病都關心住我哋,佢自細就帶最美好嘅一方面畀我。對我嚟講,依家做人比較正面都因為佢。」

事隔一年,AGA仍未能忘懷姐姐的離開,這經歷亦讓她上了寶貴一課:「唔知第二日發生咩事,聽人講就聽得多,自己感受過就好認同,所以自己更加唔會嘥時間,會做自己鍾意嘅嘢,好多嘢唔好睇得太重,盡全力去做,最緊要開心。」

凡事不看太重

AGA以往會給自己很大壓力:「以前睇得好多嘢好重,例如我寫呢首歌好唔好聽?由幕後轉做新人我係咪做得啱?但其實冇錯與對,好多嘢係自己嚇自己,依家我睇法係過咗自己嗰關、盡咗力就得!」

文:音樂組 

攝:劉智源

髮型:Veron Chan@Hair Corner(Central)

化妝:Elaw Wong@thelook-studio.com

場地:Wtc more-Hooray Bar & Restaurant

服裝:TOPSHOP