楊明張美妮趙永洪徐榮互爆瘀事捧上位
同為無綫第13期訓練班畢業的張美妮、楊明、徐榮及趙永洪的關係就如「難兄難弟」，這17年間由互相認識到變成如親人的摯友，互開玩笑的畫面充滿愛！此外，四人更難得聚首《巨輪2》上演連場鬥戲，火花四濺！
楊：楊明 張：張美妮 趙：趙永洪 徐：徐榮
初入星途上訓練班
眾人相識至今已踏入第十七年，在這個考記憶力環節，趙永洪明顯拎滿分。四人回想「上學」時期，趣事多籮籮，三位男士更不停「夾擊」美妮，爆其瘀爆往事。
趙：第一日見到美妮覺得佢好清純，李麗珍種感覺，徐榮就好似mix咁鬼鬼哋，楊明就7呎咁高嘅大舊衰，但係好靚仔。
楊：嗰時我得17歲，個人仲細，腦囟都未生埋，邊記得咁多吖。全班個個大過我，我當佢哋哥哥姐姐咁，個個都好錫我。雖然唔記得第一日見面係點，但好記得考試嗰日趙永洪個天才表演，將我哋全班同學嘅名同性格用rap唱出嚟，其他人都係唱歌、跳舞或者表演吓魔術，佢段rap真係好勁！
徐：嗰時演感情戲要借位，講完「我好鍾意你呀。」就捧住對方個面，用兩隻手指公擋住個嘴錫落手指度。
玉女背後大食烏歪
楊：嗰陣仲要扮鬧交，美妮同李忠希扮到後來真打！
張：嗰時我情緒到，真係打，最後大家入鏡撳住我，李忠希到依家仲講緊呢件事！
趙：同埋美妮有次令人好反胃，玉女形象完全破滅。嗰陣有個game要除鞋，一除就望到美妮凸咗隻腳趾公出嚟，仲要撩吓撩吓。
徐：美妮仲有兩磅半意粉事件。嗰時有間餐廳搞咗個挑戰，半個鐘食完兩磅半意粉就唔使畀錢，佢女仔人家用11分鐘就食晒！我哋其他人都要成27、8分鐘頂到好辛苦先食得完，佢食完仲好輕鬆。
張：你哋真係有所不知，點解我依家嫁作人妻呢？就係因為我有衣食！
趙：我覺得你係大食囉。
楊：佢仲要幫埋另一個女同學食，我諗佢真係好驚要畀嗰啲錢。
畢業旅行證件過期
四人又坦言除了拍劇，大家平時各有各忙，鮮有機會敍舊，但一見面卻如今天情況一樣雞啄唔斷，大家之間的友誼一直在心中。
張：最開心我哋之間嘅友誼唔止返學嗰時keep到，之後都成日一齊玩。差唔多畢業嗰陣我哋成班仲約埋一齊返大陸玩，但有個人就發生咗啲事囉！
楊：我哋一行十幾人浩浩蕩蕩咁出發，去到羅湖嗰陣成班興高采烈一路排隊一路嘻嘻哈哈，差唔多過晒關時有個人開始面都青埋。
徐：嗰個人係我嚟，佢哋成班人過晒關，我畀張證個關員，佢同我講我張證過咗期。我最後都去唔到，一個人留喺香港，但我見到佢哋眼神都好渴望我去嘅。
楊：渴望之餘亦都同時揮手講拜拜，嗰次真係玩得幾開心。
徐：直到依家我哋不時都有聚會，唔拍劇係會好少見，但一見會好多嘢講，而且唔使就住就住。
楊：對住以前啲同學講嘢、做戲都會放啲，大家個心已經通咗。
趙：friend咗十幾年，感情一定冇得比，有啲嘢唔使講已經好有默契。
兄弟嫁人衣着open
講到四人中只有美妮是女生，她笑言三子都已當她是兄弟，又感激這幾位兄弟永遠都撐住她。
張：我以前有個男朋友好衰，咁啱嗰時同楊明拍綜藝節目，我成日捉住佢訴苦，但之後又同番個男仔一齊，又唔知點同楊明解釋，佢見我咁尷尬，平時睇佢好似沒心沒肺咁，但突然語重心長咁講咗句『美妮，你開心咪得囉。』令我好感動。
趙：美妮做咗人妻之後啲衫愈嚟愈低，不過係有吸引力咗，啲戲都好咗、鬆咗，但都唔好鬆得滯，都要keep吓！
張：啲戲鬆啫，唔係身材！
楊：佢有keep，去澳門拍《巨輪2》嗰時，佢特登買咗張瑜伽墊拎過去，可能做咗幾個動作影咗幾張相甫上微博，見佢打晒燈咁好大製作。同埋佢直頭做咗闊太，我睇佢甫相計番佢應該喺澳門做咗兩次瑜伽，之後佢返香港先，就放咗張墊喺我房，話下次問我攞番跟住又冇攞，到我拍晒要走嗰陣打畀佢問，佢同我講唔要喇喎。
張：唔係闊太，不過我好開心佢哋都鍾意我老公，都係讚。結婚嗰時佢哋幾個做我姊妹，好sweet，嗰日特別感受到最親嘅朋友對我嘅愛，勁touch。
首次合體拍劇夠放
重頭劇《巨輪2》是四人自訓練班畢業以來，除實習時有機會拍住上外，首次合體拍劇，更有不少對手戲。
張：趙永洪好犀利，第一輯佢最後一句對白「I will be back」係串連佢第二輯出場，句對白仲係佢自己加嘅！
楊：我聽到個小道消息係老闆點名要佢返嚟，可想而知佢好重要！
張：當時我睇到劇本已經好開心，由訓練班出嚟，呢套係第一套我哋正式合作嘅劇，見到好多場戲我哋自己幾個拍，感覺好正！
徐：我同楊明比較多對手戲，有場要打交，如果對住唔熟嘅人真係唔敢郁手，對住佢做得好放，一個眼神已經明，完全冇隔膜。
楊：今次難得四個一齊去澳門，希望嚟緊公司開個真人騷畀我哋一齊去個trip，叫埋其他同期同學都唔錯！
後記
眾男不斷開美妮玩笑，趙永洪取笑她愈着愈性感時更以「吱吱兵」來形容：「以前台慶晚裝包到上頸，依家開到落肚臍咁滯，美妮好波！」美妮即向他怒掉紙巾發洩：「依家做咗太太唔使驚人哋誤會我，適當時因應場合去着衫，台慶佢哋真係好煩，成日引我笑，楊明咁啱企我前面，一擰過嚟就大叫『哇！你搞咩！』」場面搞笑之餘，亦流露住溫馨之情，四人可謂「打風都打唔甩」。
文：陳丹
攝：劉斌