蔡加怡漏口風佗仔啱啱好
玩具大王女兒蔡加怡前晚以新任總理的身份現身東華三院活動，現懷孕八個月的她原本想保密BB的性別，豈料言談間卻踢爆懷男丁，啱啱湊成一個「好」字。
已懷孕八個月的蔡加怡前晚現身東華三院聯歡晚宴，貴為今屆新任總理的她被問到現時腹大便便，能否應付總理的工作？她輕鬆地說：「都OK！我有同主席講就職後有一、兩個月要休息，佢都話OK，之後努力番。」她透露預產期是5月，屆時將會剖腹生產，並已準備好BB用品：「好多嘢都係家姐用過嘅，可以再用。（老公好緊張？）可能今次係第二胎，大家好Relax，冇上一胎咁緊張，上次一早買晒啲嘢。」
問到BB性別，加怡想保持神秘感而大賣關子：「到時會話畀大家知。（大女知道自己做家姐未？）知道！幾個月前已經同佢講咗細佬喺入面。」語畢的她即發現爆響口，忍不住笑了一笑！她又指女兒甚為興奮，因為很喜歡跟小朋友玩，完全不會妒忌BB：「佢有時會要我抱佢，我話抱唔到，佢就摸吓又錫吓我個肚。」
楊千嬅瘦身成功
同場出席的歌手楊千嬅以弗爆身材示人，她表示終於成功減肥：「我用咗兩個幾三星期，減咗十幾磅，以前一日食七餐，依家一日食一餐，因為已經放完我嘅悠長假期，要開工。」問到老公丁子高是否陪伴一日一餐？她笑說：「唔會！佢之前去咗禪修七日食齋，聽日返嚟，已經講定要食蒸魚、雞、炒菜同鯪魚釀辣椒。（怕唔怕佢會出家？）冇咁容易！要好有學問同智慧，我有同佢一齊禪修，佢去七日，我去四日，係幾好嘅體驗，好清淨同開心，當休息吓，個人好似淨化咗再開工。今次係我第一次去，係幾好嘅經歷會再去。」
文：名人組