姬絲汀打得火熱手指任女啜

25歲人氣女星姬絲汀史釗活（Kristen Stewart）於2008至2012年時跟羅拔柏迪臣（Robert Pattinson）的戀情備受全球矚目，N次復合加偷食簡直峰迴路轉，雖然姬絲汀現時已經連性取向都變埋，同30歲女歌手Soko打得火熱，但原來劇情可以更加奇情，九曲十三彎！

Soko曾與羅拔相睇

Soko曾受訪自爆剛由法國搬到洛杉磯時，曾被撮合跟羅拔相睇，換言之Soko曾算是跟姬絲汀係情敵，現在卻變成情侶，關係完全七國咁亂！另外Soko日前接受雜誌訪問中提到現時跟姬絲汀打得火熱，相當開心，而二人日前外出醫肚時便被影到坐在車內的姬絲汀伸出一大隻拇指畀Soko又含又舔，畫面十分意淫，勁重口味！

另外，第69屆康城電影節近日公布由名導活地亞倫（Woody Allen）執導，姬絲汀及謝西艾辛堡(Jesse Eisenberg)主演新作《Cafe Society》作開幕電影，活地成唯一一個三度有作品被選中做開幕片的導演！

文：外娛組