龍殿兒出「名」 搵曼喜出「樣」
Kee Club太子女龍殿兒前晚出席活動時透露今年將會推出自家時裝品牌女裝系列，由她親自設計，正式進軍時裝界，至於可會親自出任代言人，她笑言有意搵好友王曼喜上陣。
龍殿兒（Mara）前晚出席Max Mara活動時，透露現正忙於籌備她的自家品牌：「今年有好多大計，其中一個係推出自己個brand，係自己設計嘅女裝系列，品牌名字應該會用我個全名，另類啲同埋特別啲。（做埋代言人？）已經用咗自己個名，唔知會唔會用埋自己個樣，冇乜所謂。我品牌嘅理念係empowerment woman，想用好多唔同性格嘅人士去代表，唔淨只係自己。我同Kayla（王敏德女兒王曼喜）好friend，想搵佢，覺得佢好叻。不過呢啲遲啲先，仲有好多嘢要做，預計9月launch，依家起緊版，會喺歐洲做production。」
詩詩唔介意子丹有女埋身
同場的汪詩詩就透露丈夫甄子丹正身在南美洲的多明尼加共和國拍戲，問她為何不陪丈夫同行，她說：「來回要坐成60幾個鐘飛機喎，我唔去呀，我同啲小朋友都有同佢facetime。嗰度啲人用西班牙文叫佢葉問。（怕唔怕有啲熱情女郎埋老公身？）我唔介意喎，咁代表我老公有吸引力。」她又謂女兒在社交網上看到爹哋的騷肌肉相，問她為甚麼爹哋沒穿衣服，詩詩說：「我都好尷尬，唔知點同佢解釋，我同佢講話因為爹哋係特別嘅亞洲中國演員。」另外，提到近期多宗學童自殺新聞，詩詩坦言也有留意，她很注重跟子女的溝通，不會給予太大壓力。
吳雨霏讀書搵老公補習
而吳雨霏（Kary）提到日前仆倒跪地一事仍有餘悸，問到可會趁機check吓有否懷孕，她就肯定的表示沒有。Kary又透露大半年前開始再讀書，丈夫更充當她的私人補習老師：「佢好鍾意同我補習，我唔會發脾氣，係個好乖好聽話嘅學生，細個讀書時就心散，依家就會享受。公司有畀時間我讀書，好支持我。」當晚出席嘉賓包括有名媛嚴紀雯、林煒珽、陳君宜、周嘉儀、郭慶彬等。
文：名人組