黎明愛坤坤齊蔭吳若希睇完心思思
天王黎明（Leon）出口爆「金句」，《東網巨星》特別為Leon炮製《黎明話你知》節目，繼上集Leon與市民的Q & A後，今次輪到「星級版」與Leon你問我答，其中人氣王吳業坤的「齊蔭頭」竟搞到Leon好奇心大發，吳若希（Jinny）的問題連Leon都話具挑戰性，而Leon見到老友許志安一於「冇面畀」笑謂：「答嚟都嘥時間。」
許志安出數學題 「答你都嘥時間」
許志安：我知道黎明咩問題都應該識答，迎刃而解嘅，依家我就問一條好深嘅問題，睇吓你點答，聽住，黎明我想問你1加1減1乘1除1等於幾多？
黎明（遮眼捏鼻，想都不想便答）：係唔識，答你都嘥時間，繼續。
許志安：如果唔係呢條問題，我都可以畀你揀過第二條問題嘅，深啲，1加1等如幾多？
黎明（V字手勢）：2囉，多謝你，呢個答你。
吳業坤口啞啞 「唔識答咪唔好答」
吳業坤：點解我鍾意黎明，因為我細個已經畀阿媽薰陶，我阿媽真係好鍾意黎明，依家同黎明講嘢，簡直係我嘅夢想，因為我阿媽匯應通投票，係搵埋啲人嘅身份證投畀你o架，你真係要……真係……唉，好緊張、好興奮呀！你一定要請阿媽睇你個演唱會，喺4月幾嗰個呢，真係要呀！不過我有啲嘢想問吓你，其實我講嘢就唔叻，我知你有好多金句，如果畀記者問到口啞啞嘅時候，咁我可以點樣樣答呢？
黎明（邊睇坤坤條片，邊整理前額頭髮）：佢齊蔭o架？我想研究佢個頭，點解戴完頂帽都可平蔭嘅，算啦，唔睇啦。聽佢講金句啦，聽佢講乜啦！畀人問到口啞啞點答？唔識答咪唔好答囉，冇得講落去o架，Dead Air。
黎明答完 吳業坤反應
「多謝你答我問題呀！我有學以致用o架，我頭先都有咁回應啲大圍記者，佢哋都好滿意！我會嚟睇你演唱會o架！仲有呀，如果我開演唱會你會唔會嚟呀？你可唔可以坐喺我阿媽隔籬？佢好鍾意你o架！」
柏豪自薦寫歌「仲有人買碟咩」
周柏豪：Leon，你好，我係周柏豪，亦都係你小小嘅歌迷，我想問吓你幾時會再出唱片需要人寫歌呢？我一定有好多時間寫歌畀你o架。
黎明：太好啦，周柏豪你寫歌畀我，我完全願意接受，但我話你聽我係唔會出碟嘅，唱完送畀大家聽啦！（點解？）仲有人買碟嘅咩？
吳若希問睇相 「心靈雞湯咪沉迷」
吳若希：Hello，黎生，我係Jinny吳若希，你曾經講過黎明只可以信七成，咁我又想問下喇，依家嘅你可以信幾多成呢？
黎明：呢個問題好有挑戰性，幾年前同你講可以信七成，唔係信我，其實信邊個都唔好信晒，係咪時間可以證明到你睇？就算我講今日百分之一百啱嘅嘢，但時間都會將我真正嘅原意、設定嘅真誠扭曲到變咗唔係。
吳若希：我想問你呀，你有冇試過睇相呢，同埋你迷唔迷信o架？
黎明：我都會睇下相，聽下人講嘢，聽完人講嘢自己分析下囉。啱咪聽囉，能夠做到咪試下囉，咁通常都冇乜用o架，點解呢？你哋發唔發覺到當你遇到問題好唔順嘅時候，你會開始睇相、睇風水，風水話你聽：係呀呢排好唔順呀，隔一排就好啲o架啦！其實你順嘅時候你又唔會去睇風水，所有都係命運嚟o架！風水、命格、命相、全部都畀你係一個心靈雞湯，唔好太過在意，有個目標當然係好啦，咁風水都唔係假嘅，有科學根據，羅庚呀、中國歷史呀，不過就唔好太沉迷。
吳若希：同埋我有樣嘢又好想問你呀，之前你講過因為你豁達，所以你唔介意啲人話你唔豁達嘛，咁如果我想表現到好開心嘅時候，有乜方法可以表現到自己好開心呢？
黎明：我冇o架，我從來唔開心就表現唔開心，如果嗰日EQ低啲，我就會表現好靜，好真實o架。
黎明答完 吳若希反應
吳若希邊睇黎明給她的答案，開心大笑，更要看畢全個「黎明話你知」才停：「《黎明話你知》睇完我都係心思思，究竟點解黎生答嘢答得咁玄嘅？其實都唔係嘅，迷信嗰part我自己都係咁嘅，但係另外一part，即係點樣表現開心唔開心，你就會照直表現，我就可能就做唔到，因為我唔係黎生，我驚我匿埋一邊lonely時，啲人可能就會話我黑面，因為冇表情就會畀人話係黑面，所以都係解決唔到，咁點算呀黎生？」