官恩娜更衣室餵母乳慘遭侮辱

歌手官恩娜（Ella）去年誕下混血囝囝Gabriel-Antonio Maurellet（bébé G）後，暫時停工專心做全職媽媽，更堅持全天候餵哺母乳，雖然母乳之路漫長，但無阻她的決心！不過，昨日Ella在社交網放上抱B照，動作似正餵母乳，並留言表示她在香港某五星級酒店，因酒店內沒有育嬰室，最終在更衣室職員批准下，入更衣室餵母乳，怎料有名中年女人覺得Ella「做錯事」，故意在她面前超級大聲地打電話向酒店各部門投訴，謂有人餵人奶，令Ella有感受侮辱！

故意大聲投訴

Ella留言說：「嗰日喺香港某五星級酒店嘅女更衣室（因為喺我所在嘅兩層樓都搵唔到育嬰室，亦有問准更衣室職員）餵母乳，畀一個中年女人侮辱！其實我已經故意坐埋一邊唔好阻住人……佢走過嚟故意喺bébé G嘅頭殼頂上面同我塊面側邊大聲敲打電話同大聲鬧有人喺度餵人奶！再超級大聲打電話畀酒店各部門投訴，問人哋知唔知女更衣室發生緊乜嘢事！bébé G都畀佢嚇到喊咗出嚟，我都畀佢嚇到呆咗畀唔到反應。」

她慨嘆餵哺母乳只平常事，並Hashtag（標籤）「餵母乳無罪」的字句：「點解喺呢個年代都仲有人對餵哺母乳存咁大偏見？寶寶飲媽媽嘅母乳係最天然不過嘅事！我覺得無論如何都唔應該咁樣對一個五個月大嘅嬰兒！事後我個心好唔舒服！#餵母乳無罪！」

可愛的bébé G伏在媽咪懷裏瞓覺。	官恩娜留言講述餵母乳被辱經過。	官恩娜常跟粉絲分享餵人奶的苦與樂。

為天下媽媽出聲

事後本報詢問Ella，她謂當時被對方行為嚇呆及來不及反應，事後酒店職員亦向她道歉：「佢講嘢嗰時好近自己同BB，同埋好大聲，嗰吓嚇到呆咗，我怕嚇親BB，所以冇正面同佢理論。佢打完電話投訴完後走咗，冇幾耐，都有酒店職員走入嚟同我講唔好意思。自己冇諗過依家仲有人對餵人奶有偏見，希望可以為所有餵人奶嘅媽媽爭取吓。有時去到一啲商場或酒店，好多時育嬰室冇設施畀媽媽餵人奶，要抱住個20磅BB一邊餵人奶一邊企喺度係件好困難嘅事。」又透露曾向老公交代此事，老公亦有安慰她。

文：專案組　

採：音樂組