個唱玩特效晒舞功「唔郁覺得你冷血」

黎天王受訪時暢談將於下月28日至5月3日舉行一連六場的《黎明LEON 30TH ANNIVERSARY RANDOM LOVE SONGS 4D IN LIVE 2016》演唱會，問到為何不在紅館舉行，他解釋冇期：「申請紅館檔期需要一年時間，唔係我唔想喺2017年開，只係同事喺我唔喺度開會度時間，可能佢哋覺得我再唔開，老咗、瓜咗點算？所以佢哋提議話喺新海濱搞。」他透露場內將分成四個場館，每個場館可容納千名觀眾，大玩視覺效果及特別科技，至於票價被指昂貴，他解釋：「紅館每場坐萬二人，依家你享有嘅嘢係十分之一嘅嘢，感覺完全唔同。（蝕錢？）有可能，蝕都唔緊要，我當自己係試驗品。（騷舞功？）點可以唔跳？今次排舞老師係絕頂，因為就係我自己！Dancers跟番我跳，我唔可以做一個冷血木頭，你唔郁人哋覺得你冷血，所以點都會排幾隻舞。」為配合高科技4D製作，主辦單位Amusic不惜工本，帳幕物料如鋼材丶鐵架等共出動一百個大貨櫃從外國運抵香港，而固定帳幕的石躉則動用近四百個，疊起來總高度更超過環球貿易廣場！