朱茵湊女大犧牲Paul爭取二人世界
香港社會競爭大，無論學童抑或父母都抵受住極大壓力，更有學童因學業問題產生負面想法。身為人父的黃貫中（Paul）堅拒做「怪獸家長」，讓囡囡自由發展：「個女依家3歲先入學讀幼稚園，我唔覺得佢有咩輸蝕，唔需要佢成績好，佢想點發展我都OK。依家啲父母係想喺仔女身上搵番自己以前做唔到嘅嘢，但係仔女都係一個個體，唔應該過分控制。」
追多個聽天由命
Paul亦指心痛老婆朱茵湊女辛苦，會否追多個則聽天由命。他謂：「依家我已經好心滿意足，當然有我都會開心。不過我成日都好心痛老婆由一個好姿整嘅靚女，變到唔顧形象當街教女，放下身段真係唔係個個做到。我做男人要睇住成個家，要識抽時間同老婆二人世界，點都要留番架兩座位嘅車同佢出去玩，就算帶埋個女出街，我都唔會淨係拎住部相機影個女，都要影吓旁邊呢個為我生咗個女嘅靚女。」
最近推出新歌《我有分數》的Paul，將於下月9日在九龍灣國際展貿中心開騷。他直言已經「餓」了很久：「唔止我，啲歌迷都餓咗好耐，所以我唔會刻意去諗加啲咩新元素，到時自然會有，成個騷都係唱歌同玩結他。」
文：專案組
攝：秦健輝
場地：PizzaExpress@Kornhill Plaza
化妝：Emma Lee/Amanda But(Emma Lee)
髮型：Matthew Kong@Headquarter
服裝：KOYO