麥明詩收花媽咪一見即丟

港姐冠軍麥明詩（Louisa）、亞軍龐卓欣（Ada）、友誼小姐林凱恩及藝人陳潔玲等昨日在維園出席香港花卉展覽活動。笑言以「書生Look」出場的Louisa就大騷長腿，問大狀男友林作是否時常送花？她即謂：「送過，但係我媽咪有鼻敏感，只要一發現屋企有花都會揼咗佢！」所以就試過將花轉贈男性友人，讓他可以送給其女友：「好環保呀咁樣！」而「旋轉木馬Look」的Ada就情願男友送朱古力。

陳潔玲唔過電

講到Ada在網上開頻道，其中有一片段是男友幫Ada化妝，Louisa就指片段搞笑，更笑謂自己男友對化妝的認識比自己更深。問她有否為對方形象給予意見，她就指男友曾向自己投訴出鏡前有人想幫他梳頭：「佢好唔鍾意，話鍾意自己個『旋風頭』。」又謂自己都好喜歡男友的「旋風頭」，甚有個人風格。

至於以唐朝Look出場的陳潔玲指下星期會開拍無綫新劇《來自喵喵星的你》，將與緋聞多多的溫家偉合作，卻不擔心傳緋聞：「OK嘅！（唔過電？）拍戲會投入嘅，但我係專業演員，拍完就會識出番嚟！」

劉思希（左起）、梁茵、陳潔玲、林伊麗及李旻芳以不同的民族服出席活動。

麥明詩前日返港，即相約母親到商場食飯。

與媽咪撐枱腳

另外，Louisa前日從英國返港後就轉Look，同媽咪在屋企樓下商場開餐，兩母女雞啄唔斷。問男友何不一齊撐枱腳？自言落機後非常眼瞓的她即謂：「同媽咪食吖嘛！」談到男友疑爆何猷亨與陳瀅婚事，她即笑指男友亂講嘢。

文：影視組