盧大偉27日公祭遺孀消瘦打點
「一代笑匠」盧大偉（David）日前病逝，昨日David遺孀與演藝人協會開會商討David身後事，會後盧太透露喪禮將於本月27日在大圍寶福紀念館設靈及舉行公祭，翌日出殯。暴瘦30磅的盧太表示開會期間有進食，並笑住叫傳媒朋友請飲茶。
演藝人協會成員陳芷菁、阮兆祥及戚美珍等昨午到九龍塘為盧大偉身後事開會，David遺孀在姨甥Jeff及丁羽陪同下到場。Jeff表示盧太心情已平復，但身形消瘦：「佢瘦咗成30磅，今次開會係想逼佢食嘢，尋晚喺屋企煮粥、湯同飯畀佢食，佢都冇胃口食。」約兩小時後，盧太公布David喪禮將於本月27日在大圍寶福紀念館設靈，下午四時至六時半公祭，翌日出殯。
遺照已經揀好
盧太又透露喪禮由無綫、演藝人協會及教友協辦，以基督教儀式進行，陪葬品有David生前喜歡的衣服及聖經等。記者關心盧太可有進食？她笑說：「大家掛住幫手討論，所以我食得最多，傳媒朋友都可以請我飲茶嘅。（扶靈名單？）思考緊。（教室幾時恢復教學？）其實冇停過，只係我依家狀況未可以埋位住。」 身為演藝人協會副會長的陳芷菁透露今日再傾細節：「遺照都揀好咗，最緊要係盧太同David鍾意，紀念冊會印學生對David心底話。（喪禮費用邊個負責？）由無綫同演藝人協會去做，希望盧太唔好太辛苦。」
戚美珍被考起
此外，TVB前晚為David安排直播悼念節目《別了，Gag王盧大偉》，邀得多位David好友到場緬懷一番，包括陳百祥、戚美珍、王祖藍、丁羽、胡楓、林建明、黃淑儀及陳友等，盧太與祖藍見面即擁抱互送慰問。
祖藍表示視David為「好Friend的前輩」，近七、八年因宗教團體藝人之家稔熟，大讚對方有魄力及幽默：「佢唔Say Helloo架！第一句就用爛Gag開頭，記得有次佢錄完《獎門人》，專登打番畀錢嘉樂，話佢係做舞小姐，因為佢又有錢又快樂！」戚美珍回味入行初期與David在《歡樂今宵》合作，經常被對方的爛Gag考起，到近年David患病仍繼續努力想新Gag。
文：影視組